Axborot va ommaviy kommunikatsiyalar agentligi 7-dekabr kuni soat 12:00 lar atrofida elektrdan uzildi. Oqibatda “Agrobank” faoliyati yuzasidan shu vaqtda o‘tkazilishi kerak bo‘lgan tadbirni boshlash kechikkan. Bu haqda “Muxbir Daliyev” kanali xabar berdi.
Ta’kidlash joizki, so‘nggi vaqtlarda elektr ta’minotidan uzilish muammosi keskin oshdi. Shunday sharoitda gaz-svet muammosini yozgani uchun AOKA “Kun.uz”ga ogohlantirish xati yuborgan, ular qonunchilik talablariga mos kelmaydigan axborot tarqatgan deb hisoblagan.
O‘zbekistondagi elchixonalar AOKA harakatiga munosabat bildirib, agar matbuotda gaz va elektr ta’minoti xizmatlarining yomon ishlashini jamoatchilik tanqid qilsa, bu asosli bo‘lsa, matbuot bu haqda yozishga haqli ekanligini aytgandi.
Keyinroq AOKA direktori Asadjon Xo‘jayev 3-dekabr kuni o‘tkazilgan “O‘zbekiston Respublikasining Konstitutsiyasi va qonunchiligida so‘z hamda matbuot erkinligi va O‘zbekistonda OAVni rivojlantirish jarayonlari” mavzusidagi davra suhbatida OAVlari faoliyati haqida o‘z fikrini bildirib, noxolis axborot tarqalishida OAV aybdor emasligini, agar davlat organlari tezkorlik bilan javob qaytarsa, asossiz ma’lumotlar, fikrlar bildirilishiga o‘rin qolmasligini ta’kidlagan.
Eslatib o‘tamiz, 2019-yilning dekabr oyida Toshkentda TV orqali jonli efirda ko‘rsatilayotgan saylov debati elektr o‘chgani sabab uzilib qolgandi. Tadbir ishtirokchilari taxminan 5-7 daqiqa davomida chiroqsiz qolib ketgan. Bosh vazir Abdulla Aripov elektr energiyasi bilan yuz bergan noxush holatlarni keskin tanqid qilib, bu holatni sharmandali deb aytgandi.
Izoh (0)