O‘zbekiston Moliya vazirligi huzuridagi budjetdan tashqari Pensiya jamg‘armasiga kelib tushgan murojaatlar o‘rganilganda AT “Xalq banki” sayyor kassalari tomonidan pensiya to‘lovlarini kech to‘lash holatlari aniqlangan. Bu haqda jamg‘arma matbuot xizmati “Daryo”ga ma’lum qildi.
Xususan, Namangan viloyati Uychi tumanida istiqomat qiluvchi fuqaro 6-noyabr kuni Pensiya jamg‘armasi “Ishonch telefoni”ga sentabr oyi pensiyasi berilmaganligi bo‘yicha murojaat qilgan.
Murojaat o‘rganilganda bir necha fuqarolarning 2020-yil sentabr oyi to‘lov ro‘yxatiga chiqarilgan va “Xalq banki”ning sayyor kassasi xodimi tomonidan 2020-yil sentabr oyida to‘langanlik to‘g‘risida ma’lumot kiritilgan, biroq to‘lab berilmagan.
Pensiya jamg‘armasiga murojaat qilganidan keyin fuqaroning qonuniy pensiyasi 2020-yilning 7-noyabr kuni to‘lab berilishi ta’minlangan. Shuningdek, Navoiy viloyati Xatirchi tumanida istiqomat qiluvchi fuqaroga ham “Xalq banki”ning sayyor kassasi xodimi tomonidan dasturda to‘landi belgisini qo‘yib, pensiya puli asossiz ravishda to‘lab berilmaganligi aniqlangan. Pensiya to‘lovlarini kechiktirishga yo‘l qo‘ygan xodimlar bilan mehnat shartnomasi bekor qilingan.
“Bundan tashqari, amaldagi tartibga asosan pensiyalar, nafaqalar va boshqa to‘lovlarni qaydnomada ko‘rsatilmagan shaxslarga ishonchnomasiz topshirish, shuningdek, pensiya va nafaqa oluvchilarga ular yashash joylaridan ro‘yxatdan chiqarilgandan keyin topshirish, pul-buyum lotereyalar va boshqa mahsulotlarni pensiyalar, nafaqalar va boshqa to‘lovlar pullari hisobidan sotish taqiqlanadi. Biroq joylarda sayyor kassa xodimlari tomonidan amaldagi tartibga zid ravishda ishonchnomasiz to‘lash holatlari aniqlanmoqda. Bu esa o‘z navbatida fuqarolarning e’tirozlariga sabab bo‘lyapti”, — deyiladi xabarda.
Ta’kidlanishicha, Samarqand viloyati Toyloq tumanida istiqomat qiluvchi fuqaro D.G. oktabr va noyabr oylari pensiyasi berilmaganligi bo‘yicha qilgan murojaatini o‘rganish davomida bir necha fuqaroning oktabr va noyabr oyi to‘lov ro‘yxatiga chiqarilgan va “Xalq banki”ning sayyor kassasi xodimi tomonidan amaldagi tartibda zid ravishda ishonchnomasiz fuqaro G.T.ga to‘lab berilganligi aniqlangan.
“Pensiya jamg‘armasiga murojaat qilganidan keyin fuqaroning qonuniy pensiyasi to‘lab berilishi ta’minlandi”, — deya qayd etiladi xabarda.
Pensionerga pensiya to‘lovi kech to‘lab berish va ishonchnomasiz to‘lash holatlari bo‘yicha Markaziy bank va AT “Xalq banki” boshqaruviga tegishli chora ko‘rish bo‘yicha xat yuborilgan.
Avvalroq O‘zbekiston Budjetdan tashqari pensiya jamg‘armasi ish stajini hisoblashdagi qo‘shib yozishlar haqida ma’lumot bergan edi.
Izoh (0)