Yulduzli qo‘shnilar, saralangan avtomobillar va suv sporti. “Manchester Siti” yulduzi Serxio Aguero qanday hayot kechiradi?

Uzoq yillar mobaynida yuqori darajada o‘yin ko‘rsatib kelgan Serxio Aguero so‘nggi oylarda jarohati sabab maydonga tushmayotgan bo‘lsa-da, hamon dunyoning eng yaxshi hujumchilari qatorida tilga olinadi. “Manchester Siti” Agueroni yangi bosqichga ko‘tarilishida qanchalik yordam bergan bo‘lsa, Serxio ham klubning yanada ommalashishida o‘zining ulkan hissasini qo‘shgan. Biroq bugun uning “Siti” va boshqa jamoalardagi faoliyati haqida emas, balki yashash tarzi, qimmatli xaridlari, xobbilari va umuman qanday hayot kechirishi haqida hikoya qilamiz.

Agueroning uylari

Serxio Manchesterdan unchalik uzoq bo‘lmagan Cheshir grafligida joylashgan Olderli Ejda yashaydi. Ushbu hududda Manchester shahrining har ikkala klubidan ko‘plab futbolchilar istiqomat qiladi, ular orasida Rahim Sterling, Pol Pogba va David de Xea singari mashhur nomlarni uchratish mumkin. Agueroning uyi 3 million funt sterlinglik qiymatga ega.

Aguero imkon qadar ommaga uyining ichkari qismini ko‘rsatmaslikka harakat qiladi. Shaxsiy sovrinlari, gol urgan uchrashuvdagi libos va to‘plarni esa alohida garderobda saqlaydi.

Shuningdek, Kun Agueroning Mayamida ham qiymati 9 million yevroga teng bo‘lgan hashamatli uyi bor. Agueroning ushbu imoratida beshta yotoqxona, bir nechta mehmonxona va oshxona mavjud. Bundan tashqari, uy sohil bo‘yida joylashganligi bilan alohida ahamiyatga ega. Serxio ta’tilga chiqqan paytlari vaqtini aynan Mayamida o‘tkazadi.

Agueroning mashinalari

Aksariyat futbolchilar bir qancha qimmatbaho mashinalarni xarid qiladi. Tabiiyki, Aguero ham bundan mustasno emas.

Biroq u eng saralangan mashinalarni xush ko‘radi. Turli manbalarga ko‘ra, uning garajidan Lamborghini Aventador (500 ming yevro), Range Rover (100 ming yevro), Audi R8 (125 ming yevro) va Nissan GTR (150 ming yevro) kabi avtoulovlar o‘rin olgan.

Agueroning xobbilari

Aguero futbol o‘yinlari va mashg‘ulotlardan bo‘sh vaqtlarida o‘g‘li bilan vaqt o‘tkazishni, filmlar tomosha qilishni va suv sporti bilan bog‘liq bo‘lgan barcha narsani yaxshi ko‘radi. U bo‘sh vaqt topdi deguncha, yaxtalar va suv mototsikli tomon oshiqadi. Bundan tashqari baliq ovlash uning eng nozik tomonlaridan biri hisoblanadi.

Agueroning do‘stlari kim?

Futboldan tashqarida Agueroning bir qancha do‘stlari bor, biroq millionlar o‘yinida uning birgina sodiq birodari bor – bu Messi. Ular Argentinaning turli yosh toifalaridagi terma jamoalari sharafini birgalikda himoya qilgan. Shuningdek, ular kelajakda aynan bir klub safida to‘p surishni orzu qiladi. Qayd etish o‘rinli, 2020-yilning yozida bunga bir baxya qolgandi.

Agueroning daromadi

Agueroning “Manchester Siti”dagi bir yillik maoshi deyarli 12 million funti tashkil etadi. Shuningdek, Kun turli xil reklama shartnomalari va bonuslar orqali ham yaxshigina daromad ko‘radi. Uning 2019-yildagi umumiy daromadi 24,3 million yevroni tashkil qilgandi.