Юлдузли қўшнилар, сараланган автомобиллар ва сув спорти. «Манчестер Сити» юлдузи Серхио Агуэро қандай ҳаёт кечиради?

Узоқ йиллар мобайнида юқори даражада ўйин кўрсатиб келган Серхио Агуэро сўнгги ойларда жароҳати сабаб майдонга тушмаётган бўлса-да, ҳамон дунёнинг энг яхши ҳужумчилари қаторида тилга олинади. «Манчестер Сити» Агуэрони янги босқичга кўтарилишида қанчалик ёрдам берган бўлса, Серхио ҳам клубнинг янада оммалашишида ўзининг улкан ҳиссасини қўшган. Бироқ бугун унинг «Сити» ва бошқа жамоалардаги фаолияти ҳақида эмас, балки яшаш тарзи, қимматли харидлари, хоббилари ва умуман қандай ҳаёт кечириши ҳақида ҳикоя қиламиз.

Агуэронинг уйлари

Серхио Манчестердан унчалик узоқ бўлмаган Чешир графлигида жойлашган Олдерли Эжда яшайди. Ушбу ҳудудда Манчестер шаҳрининг ҳар иккала клубидан кўплаб футболчилар истиқомат қилади, улар орасида Раҳим Стерлинг, Пол Погба ва Давид де Хеа сингари машҳур номларни учратиш мумкин. Агуэронинг уйи 3 миллион фунт стерлинглик қийматга эга.

Агуэро имкон қадар оммага уйининг ичкари қисмини кўрсатмасликка ҳаракат қилади. Шахсий совринлари, гол урган учрашувдаги либос ва тўпларни эса алоҳида гардеробда сақлайди.

Шунингдек, Кун Агуэронинг Майамида ҳам қиймати 9 миллион еврога тенг бўлган ҳашаматли уйи бор. Агуэронинг ушбу иморатида бешта ётоқхона, бир нечта меҳмонхона ва ошхона мавжуд. Бундан ташқари, уй соҳил бўйида жойлашганлиги билан алоҳида аҳамиятга эга. Серхио таътилга чиққан пайтлари вақтини айнан Майамида ўтказади.

Агуэронинг машиналари

Аксарият футболчилар бир қанча қимматбаҳо машиналарни харид қилади. Табиийки, Агуэро ҳам бундан мустасно эмас.

Бироқ у энг сараланган машиналарни хуш кўради. Турли манбаларга кўра, унинг гаражидан Lamborghini Aventаdor (500 минг евро), Range Rover (100 минг евро), Audi K8 (125 минг евро) ва Nissan GTR (150 минг евро) каби автоуловлар ўрин олган.

Агуэронинг хоббилари

Агуэро футбол ўйинлари ва машғулотлардан бўш вақтларида ўғли билан вақт ўтказишни, фильмлар томоша қилишни ва сув спорти билан боғлиқ бўлган барча нарсани яхши кўради. У бўш вақт топди дегунча, яхталар ва сув мотоцикли томон ошиқади. Бундан ташқари балиқ овлаш унинг энг нозик томонларидан бири ҳисобланади.

Агуэронинг дўстлари ким?

Футболдан ташқарида Агуэронинг бир қанча дўстлари бор, бироқ миллионлар ўйинида унинг биргина содиқ биродари бор – бу Месси. Улар Аргентинанинг турли ёш тоифаларидаги терма жамоалари шарафини биргаликда ҳимоя қилган. Шунингдек, улар келажакда айнан бир клуб сафида тўп суришни орзу қилади. Қайд этиш ўринли, 2020 йилнинг ёзида бунга бир бахя қолганди.

Агуэронинг даромади

Агуэронинг «Манчестер Сити»даги бир йиллик маоши деярли 12 миллион фунти ташкил этади. Шунингдек, Кун турли хил реклама шартномалари ва бонуслар орқали ҳам яхшигина даромад кўради. Унинг 2019 йилдаги умумий даромади 24,3 миллион еврони ташкил қилганди.