Toshkentda kimo‘zarga harakatlanib, to‘qnashgan ikki avtobus haydovchilari ishdan bo‘shatildi

Toshkent shahrida 4-dekabr kuni 72- va 148-sonli avtobus yo‘nalishi haydovchilari kimo‘zarga harakatlanishi natijasida ikki avtobus bir-biriga urilgani haqida xabar berilgandi. Mazkur avtobuslar haydovchilari bilan tuzilgan mehnat shartnomalari bekor qilindi. Bu haqda “Toshshahartransxizmat" AJ axborot xizmati xabar berdi.

Ikki avtobus o‘rtasidagi poyga ijtimoiy tarmoqlarda tarqalgach, “Toshshahartransxizmat” mazkur holatni tezkor ravishda o‘rganib chiqqan.

Kompaniya tomonidan ma’lum qilinishicha, 4-dekabr kuni soat 07:40 da “2-avtobus saroyi” MChJ haydovchisi F.Mirsaidov 72-sonli yo‘nalishda Mercedes-Benz avtobusini, “5-avtobus saroyi” MChJ haydovchisi D.Do‘smatov 148-yo‘nalishda Isuzu avtobusini Maxtumquli ko‘chasi bo‘ylab boshqarib borayotib, yo‘lovchilar va boshqa harakat ishtirokchilari hayotini xavf ostiga qo‘ygan holda kimo‘zarga harakat qilgan va “Ashxobod saylgohi” bekatida to‘qnashuv sodir etgan.

“O‘z navbatida, mazkur haydovchilar yo‘lovchilar va boshqa harakat ishtirokchilari hayotini xavf ostiga qo‘ygan holda harakatlanib, qoidabuzarlikka yo‘l qo‘yishi oqibatida YTH sodir bo‘lganligi uchun ular bilan avtosaroy o‘rtasida tuzilgan mehnat shartnomasi bekor qilindi”, — deyiladi kompaniya xabarida.

Ichki ishlar vazirligi Yo‘l harakati xavfsizligi bosh boshqarmasi tomonidan xabar berilishicha, mazkur hodisa oqibatida hech kim tan jarohati olmagan.

Mazkur hodisa yuzasidan qoidabuzar haydovchilarga nisbatan Toshkent shahar IIBB YHXB YPX inspektori tomonidan Ma’muriy javobgarlik to‘g‘risidagi kodeksning 134-moddasiga (transport vositalari haydovchilarining yo‘l harakati qoidalarini buzishi jabrlanuvchiga yengil tan jarohati yoki ancha miqdorda moddiy zarar yetkazilishiga olib kelishi) asosan ma’muriy bayonnoma rasmiylashtirildi.

Avvalroq Toshkentda Isuzu avtobusi simyog‘ochga urilishi oqibatida besh kishi jarohatlangani, 116-yo‘nalishda harakatlanuvchi avtobus yonib ketgani hamda Samarqandda ichida 20 nafar yo‘lovchi bo‘lgan avtobus asfaltning sirpanchiqligi oqibatida ag‘darilib ketgani haqida xabar berilgandi.