O‘zbekistonda 2020-yil 1-dekabr holatiga ko‘ra bemorlar bilan ishlagan vaqtida koronavirus yuqtirib olib, vafot etgan tibbiyot xodimlarining faqat ikki nafariga 250 million so‘m miqdorida bir martalik to‘lov to‘lab berilgan. Bu haqda Moliya vazirligining Respublika bo‘yichakoronavirusga qarshi kurash tadbirlari uchun jalb qilingan xodimlarga to‘lovlarni to‘lanishi to‘g‘risidagi Ma’lumotnomasida bildirilgan.
Prezidentning 2020-yil 26-martdagi qarori bilan bemorlar bilan ishlash vaqtida koronavirusni yuqtirib olgan tibbiyot, sanitariya-epidemiologiya xizmati va boshqa xodimlarga bir yo‘la beriladigan qo‘shimcha to‘lovlar miqdorlari belgilangan edi. Unga ko‘ra, koronavirusni yuqtirib olganlarga 100 million so‘mdan, kasallikni yuqtirish oqibatida og‘ir ahvolga tushgan va sog‘lig‘i tiklanmagan taqdirda (vafot etsa), uning oila a’zolariga 250 million so‘mdan to‘lanishi lozim edi.
Moliya vazirligidan “Daryo”ga ma’lum qilishlaricha, 2020-yil 1-dekabr holatiga Inqirozga qarshi kurish jamg‘armasi mablag‘lari hisobidan koronavirus infeksiyasi tarqalishiga qarshi kurashish doirasida jami 70 nafar xodimga — ularning 10 nafari vrach, 37 nafari o‘rta tibbiyot xodimi, 23 nafari kichik tibbiyot xodimi — 10,031 milliard so‘m (yagona ijtimoiy to‘lov va boshqa majburiy ushlanmalar bilan birga) to‘lab berilgan.
Bunda:
- bemorlar bilan ishlagan vaqtida koronavirus infeksiyasi yuqtirib olgan tibbiyot, sanitariya-epidemiologiya xizmati va boshqa xodimlardan 69 nafariga 9,672 milliard so‘m;
- Toshkent shahrida koronavirus infeksiyasini yuqtirish natijasida vafot etgan bir nafar xodimning oila a’zolariga 359 million so‘m (majburiy ushlanmalar bilan birga) to‘langan.
Qayd etish joiz, Prezident Shavkat Mirziyoyevning iyul va avgust oylaridagi farmonlariga muvofiq, koronavirus pandemiyasiga qarshi kurashga jalb etilgan jami sakkiz nafar tibbiyot xodimi vafotidan so‘ng “Jasorat” medali bilan taqdirlangan edi. Ulardan biri — yakkasaroylik shifokor Alisher Uralovning oila a’zolariga uning qizi OAV orqali chiqish qilgach, 250 million so‘mlik bir martalik to‘lov o‘tkazib berilgani iyul oyida ma’lum qilingan.
30-iyul kuni Sog‘liqni saqlash vazirligi huzuridagi koronavirusga qarshi kurash bo‘yicha shtab a’zosi Habibulla Oqilov “o‘tgan haftadagi ma’lumotlar bo‘yicha” mamlakat bo‘yicha 540 nafardan ortiq tibbiyot xodimi koronavirusga chalinganini ma’lum qilgan edi. Keyinchalik ularning soni qanchalik ko‘paygani noma’lum. Oktabr oyida Qashqadaryo hokimligi viloyatda pandemiya davrida 27 nafar tibbiyot xodimi vafot etganini bildirgan edi.
Moliya vazirligi matbuot xizmatidan “Daryo”ga ma’lum qilishlaricha, vazirlik 100—250 million so‘mlik to‘lovlarni amalga oshirish bo‘yicha tegishli vazirlik va idoralardan talabnomalar kelib tushishi bilan har doim to‘lovlarni o‘z vaqtida o‘tkazib kelgan, bu borada qondirilmay qolgan biror talabnoma yo‘q. Koronavirusga chalingan tibbiyot xodimlari (masalan, iyul oyi oxirida taxminan 540 nafarni tashkil etgan) va bir martalik yordam pulini olganlar (1-dekabr holatiga ko‘ra 69 nafar) sonidagi farq yuzasidan esa Sog‘liqni saqlash vazirligidan izoh olish tavsiya qilindi.
Izoh (0)