Тошкент шаҳрида 4 декабрь куни 72- ва 148-сонли автобус йўналиши ҳайдовчилари кимўзарга ҳаракатланиши натижасида икки автобус бир-бирига урилгани ҳақида хабар берилганди. Мазкур автобуслар ҳайдовчилари билан тузилган меҳнат шартномалари бекор қилинди. Бу ҳақда «Тошшаҳартрансхизмат" АЖ ахборот хизмати хабар берди.
Икки автобус ўртасидаги пойга ижтимоий тармоқларда тарқалгач, «Тошшаҳартрансхизмат» мазкур ҳолатни тезкор равишда ўрганиб чиққан.
Компания томонидан маълум қилинишича, 4 декабрь куни соат 07:40 да «2-автобус саройи» МЧЖ ҳайдовчиси Ф.Мирсаидов 72-сонли йўналишда Mercedes-Benz автобусини, «5-автобус саройи» МЧЖ ҳайдовчиси Д.Дўсматов 148-йўналишда Isuzu автобусини Махтумқули кўчаси бўйлаб бошқариб бораётиб, йўловчилар ва бошқа ҳаракат иштирокчилари ҳаётини хавф остига қўйган ҳолда кимўзарга ҳаракат қилган ва «Ашхобод сайлгоҳи» бекатида тўқнашув содир этган.
«Ўз навбатида, мазкур ҳайдовчилар йўловчилар ва бошқа ҳаракат иштирокчилари ҳаётини хавф остига қўйган ҳолда ҳаракатланиб, қоидабузарликка йўл қўйиши оқибатида ЙТҲ содир бўлганлиги учун улар билан автосарой ўртасида тузилган меҳнат шартномаси бекор қилинди», — дейилади компания хабарида.
Ички ишлар вазирлиги Йўл ҳаракати хавфсизлиги бош бошқармаси томонидан хабар берилишича, мазкур ҳодиса оқибатида ҳеч ким тан жароҳати олмаган.
Мазкур ҳодиса юзасидан қоидабузар ҳайдовчиларга нисбатан Тошкент шаҳар ИИББ ЙҲХБ ЙПХ инспектори томонидан Маъмурий жавобгарлик тўғрисидаги кодекснинг 134-моддасига (транспорт воситалари ҳайдовчиларининг йўл ҳаракати қоидаларини бузиши жабрланувчига енгил тан жароҳати ёки анча миқдорда моддий зарар етказилишига олиб келиши) асосан маъмурий баённома расмийлаштирилди.
Аввалроқ Тошкентда Isuzu автобуси симёғочга урилиши оқибатида беш киши жароҳатлангани, 116-йўналишда ҳаракатланувчи автобус ёниб кетгани ҳамда Самарқандда ичида 20 нафар йўловчи бўлган автобус асфальтнинг сирпанчиқлиги оқибатида ағдарилиб кетгани ҳақида хабар берилганди.
Изоҳ (0)