Sog‘liqni saqlash vazirining buyrug‘i bilan Zangiota tumanidagi 1-son yuqumli kasalliklar shifoxonasi tarkibida koronavirusga chalingan yoki unga gumon qilingan shoshilinch terapevtik yordamga muhtoj bemorlar hamda homiladorlar uchun bo‘lim ochilishi tasdiqlandi. Bu haqda vazirlik matbuot xizmati xabar berdi.
Shuningdek, Zangiota tumanidagi 2-son yuqumli kasalliklar shifoxonasi tarkibida koronavirusga chalingan yoki unga gumon qilingan shoshilinch jarrohlik yordamiga muhtoj bemorlar uchun bo‘lim faoliyatini boshlashi ham belgilandi.
Qayd etilishicha, ushbu bo‘limlar O‘zbekistonda epidemik vaziyatning barqarorlashayotganligi munosabati bilan aholiga ko‘rsatiladigan shoshilinch va ixtisoslashtirilgan tibbiy xizmat sifat va samaradorligini oshirish maqsadida ochiladi.
Avval Toshkentdagi uchta tibbiyot muassasasi COVID-19 bemorlarini qabul qilishni to‘xtatib, odatiy ish faoliyatiga qaytgani haqida xabar berilgan edi. Ushbu shifoxonalar 2-dekabrdan boshlab koronavirusga chalingan bemorlarni qabul qilishni to‘xtatadi, kasalxonalardagi davolanish davom ettirilishi talab etiladigan bemorlar tegishliligi bo‘yicha 1- va 2-son Zangiota yuqumli kasalliklar shifoxonalariga ko‘chiriladi.
Bundan tashqari, 15-martdan buyon COVID-19 bemorlarini davolash bilan shug‘ullangan Virusologiya ilmiy tekshirish instituti klinikasi odatiy ish faoliyatiga qaytdi, Samarqandning Kattaqo‘rg‘on shahri va Urgut tumanidagi COVID markazlari yopildi, Toshkentdagi ayrim taqsimlash markazlari ham yopilmoqda.
Izoh (0)