Fayzulla Mamanov Surxondaryo viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari — viloyat iqtisodiy taraqqiyot va kambag‘allikni qisqartirish bosh boshqarmasi boshlig‘i lavozimiga tayinlandi. Bu haqda “Daryo”ga hokimlik axborot xizmati rahbari Zahiriddin To‘rayev ma’lum qildi.
Ta’kidlanishicha, 3-dekabr kuni viloyat hokimligida bo‘lib o‘tgan videoselektor yig‘ilishida To‘ra Bobolov so‘z olib, Fayzulla Mamanovni jamoatchilikka tanishtirgan.
Fayzulla Mamanov 1977-yilning 21-oktabr kuni Qiziriq tumanida tug‘ilgan. U 1999-yilda Toshkent irrigatsiya va qishloq xo‘jaligini mexanizatsiyalashtirish muhandislari instituti, 2004-yilda Toshkent moliya instituti, 2010-yilda O‘zbekiston Respublikasi Prezidenti huzuridagi Davlat boshqaruvi akademiyasini tamomlagan.
Mutaxassisligi bo‘yicha muhandis, iqtisodchi bo‘lgan yangi o‘rinbosar 2000—2005-yillarda Dehqon va fermer xo‘jaliklari uyushmasi, 2005—2008-yillarda O‘zbekiston liberal-demokratik partiyasi ijroiya qo‘mitasi apparati, 2008—2010-yillarda O‘zbekiston Fermer xo‘jaliklari uyushmasi, 2010—2013-yillarda O‘zbekiston Savdo-sanoat palatasi, 2013—2019-yillarda Savdo-sanoat palatasining Toshkent viloyati hududiy boshqarmasida mas’ul lavozimlarda ishlagan.
Fayzulla Mamanov 2019-yilning yanvaridan beri Toshkent viloyati, Toshkent tumani hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari— Iqtisodiy taraqqiyot va kambag‘allikni qisqartirish bo‘limi boshlig‘i sifatida faoliyat yuritib kelayotgan edi.
Eslatib o‘tamiz, Surxondaryo viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari vazifasida ishlab kelgan Rustam Pardayev 2020-yilning noyabr oyida Denov tumani hokimi etib tayinlangandi.
Izoh (0)