Соғлиқни сақлаш вазирининг буйруғи билан Зангиота туманидаги 1-сон юқумли касалликлар шифохонаси таркибида коронавирусга чалинган ёки унга гумон қилинган шошилинч терапевтик ёрдамга муҳтож беморлар ҳамда ҳомиладорлар учун бўлим очилиши тасдиқланди. Бу ҳақда вазирлик матбуот хизмати хабар берди.
Шунингдек, Зангиота туманидаги 2-сон юқумли касалликлар шифохонаси таркибида коронавирусга чалинган ёки унга гумон қилинган шошилинч жарроҳлик ёрдамига муҳтож беморлар учун бўлим фаолиятини бошлаши ҳам белгиланди.
Қайд этилишича, ушбу бўлимлар Ўзбекистонда эпидемик вазиятнинг барқарорлашаётганлиги муносабати билан аҳолига кўрсатиладиган шошилинч ва ихтисослаштирилган тиббий хизмат сифат ва самарадорлигини ошириш мақсадида очилади.
Аввал Тошкентдаги учта тиббиёт муассасаси COVID-19 беморларини қабул қилишни тўхтатиб, одатий иш фаолиятига қайтгани ҳақида хабар берилган эди. Ушбу шифохоналар 2 декабрдан бошлаб коронавирусга чалинган беморларни қабул қилишни тўхтатади, касалхоналардаги даволаниш давом эттирилиши талаб этиладиган беморлар тегишлилиги бўйича 1- ва 2-сон Зангиота юқумли касалликлар шифохоналарига кўчирилади.
Бундан ташқари, 15 мартдан буён COVID-19 беморларини даволаш билан шуғулланган Вирусология илмий текшириш институти клиникаси одатий иш фаолиятига қайтди, Самарқанднинг Каттақўрғон шаҳри ва Ургут туманидаги COVID марказлари ёпилди, Тошкентдаги айрим тақсимлаш марказлари ҳам ёпилмоқда.
Изоҳ (0)