3-dekabr kuni Xalqaro press-klubning so‘z hamda matbuot erkinligi haqida davra suhbati o‘tkazildi. Unda Adliya vaziri Ruslanbek Davletov so‘z erkinligi masalasida qonunchilikning roli masalalariga to‘xtalib o‘tdi.
“Prezidentning ‘Xalq bilan muloqot’ konsepsiyasi kuchga kirgandan so‘ng ayni mana shu jarayonlarga turtki berildi, birinchi qadamlar shundan boshlandi.
Ayniqsa, huquqshunoslar uchun so‘z erkinligining ahamiyati juda katta. Qonunni o‘z yo‘liga qabul qilamiz, chunki men qonunlarni keltiraman, ular Konstitutsiyada ham turibdi. Axborot erkinliklari to‘g‘risidagi qonunlarimiz 1997-yildan beri qabul qilingan, 2007-yilda OAV to‘g‘risidagi qonunlarning yangi redaksiyasini qabul qilgandik, turgan edi-ku bu qonunlar.
O‘sha payt ham majburiy edi bajarilishi, ya’ni aytmoqchimizki, ijro nuqtayi nazaridan qonunlarni amalda insonlarning hayotiga bevosita yetib borishi nuqtayi nazaridan so‘z erkinligi juda katta ahamiyatga egaki, ular fuqarolik institutlari, jamoatchilik nazoratining bir bo‘lagi. Hammamiz guvohi bo‘lyapmiz, davlat xaridlari, korrupsiya bo‘yicha achchiq-achchiq savollar o‘rtaga tashlanyapti.
Lekin bir narsaga e’tibor qilish kerak, jurnalist va blogerlar olayotgan davlat xaridlari to‘g‘risida yoki boshqa ma’lumotlar qayerdan chiqyapti? Davlatning o‘zi shunga imkoniyat yaratib beryapti, ya’ni ochiqlik siyosati, budjetni qabul qilish jarayonlari ochiqligi natijasida budjetning har bir parametrlari omma orasida keng muhokama qilinyapti.
Huquq bor joyda chegara ham bo‘lishi kerak, faqat yashash huquqida chegara bo‘lmasligi kerak, u eng oliy ne’mat. Boshqa huquqlarda ayrim chegaralar bo‘lishi kerak. Bu dunyo bo‘yicha tan olingan standart.
Bugungi O‘zbekiston sharoitida cheklovlar to‘g‘risida kamroq gapirishimiz kerak deb o‘ylayman, chunki cheklashga juda ustamiz, shu paytgacha buni juda ham zo‘r uddalaganmiz. Endi o‘ylaymanki, huquqni ta’minlash to‘g‘risida ko‘proq gapirishimiz kerak.
Ko‘p qonunlar haqida gapirildi, biz mana shu o‘zgarishlar jarayonida qandaydir qonunlarni qayta ko‘rib chiqmadik, bu qonunlar bor edi. Ularning realizatsiyasi, amalga oshirilishi yuz bergani uchun mana shu holatlar kuzatilyapti”, – dedi Ruslanbek Davletov.
Mavzuga doir:
Izoh (0)