Surxondaryo viloyatining Jarqo‘rg‘on tumaniga yangi hokim tayinlandi. Bu haqda “Daryo”ga viloyat hokimligi axborot xizmati rahbari Zahiriddin To‘rayev ma’lum qildi.
Ta’kidlanishicha, 3-dekabr, payshanba kuni viloyat rahbari To‘ra Bobolov ishtirokida Xalq deputatlari Sherobod tumani kengashining navbatdan tashqari sessiyasi bo‘lib o‘tgan. Unda Jarqo‘rg‘on tumaniga 2018-yildan beri O‘zbekiston qurilish vaziri o‘rinbosari lavozimida ishlagan Bahodir O‘roqov hokim etib tasdiqlangan.
Bahodir O‘roqov 1979-yilning 17-fevralida Jarqo‘rg‘on tumanida tug‘ilgan. 1999-yilda Toshkent irrigatsiya va qishloq xo‘jaligini mexanizatsiyalashtirish muhandislari oliygohi, 2008-yilda Toshkent moliya instituti, 2016-yilda Bank-moliya akademiyasini tamomlagan.
2003—2005-yillarda Surxondaryo viloyati moliya boshqarmasi yetakchi iqtisodchisi, 2005-2017-yillarda O‘zbekiston Respublikasi moliya vazirligi investitsiyalar boshqarmasi bo‘lim boshlig‘i, 2017—2018-yillarda Davlat arxitektura va qurilish qo‘mitasi raisi o‘rinbosari lavozimlarida ishlagan.
Bundan avval Surxondaryo hokimining sobiq o‘rinbosari Sherobodga hokim etib tayinlangani xabar berilgan edi.
Mavzuga doir:
Izoh (0)