Surxondaryo viloyatining Sherobod tumaniga yangi hokim tayinlandi. Bu haqda “Daryo”ga viloyat hokimligi axborot xizmati rahbari Zahiriddin To‘rayev ma’lum qildi.
Ta’kidlanishicha, 3-dekabr, payshanba kuni viloyat rahbari To‘ra Bobolov ishtirokida Xalq deputatlari Sherobod tumani kengashining navbatdan tashqari sessiyasi bo‘lib o‘tgan. Unda tuman hokimi Alisher Amirov boshqa ishga o‘tganligi munosabati bilan lavozimidan ozod qilingan. Mazkur tumanga ayni kunga qadar Jarqo‘rg‘on tumani hokimi lavozimida faoliyat yuritib kelayotgan Ziyodulla Davlatov hokim etib tasdiqlangan.
Ziyodulla Davlatov 1974-yil 3-martda Termiz tumanida tug‘ilgan bo‘lib, 2006-yilda Toshkent davlat iqtisodiyot universitetini, 2007-yilda O‘zbekiston Respublikasi Prezidenti huzuridagi Davlat boshqaruvi akademiyasini tamomlagan.
2007—2010-yillarda AT “Xalq banki” ichki audit boshqarmasi boshlig‘i, kredit departamenti direktori, 2010—2013-yillarda “Xalq banki” Toshkent viloyati filiali boshlig‘i, 2013—2017-yillarda Surxondaryo viloyati hokimining iqtisodiyot va ijtimoiy rivojlantirish masalalari bo‘yicha o‘rinbosari, 2017-yildan shu kunga qadar Jarqo‘rg‘on tumani hokimi lavozimida ishlagan.
Mavzuga doir:
Izoh (0)