Санкт-Петербург ҳукумати туристларга мурожаат йўллаб, коронавирус пандемияси сабаб Янги йил байрамларида шаҳарга келмасликни сўради, деб хабар беради «Интерфакс».
«Биз меҳмонларни, туристларни жуда яхши кўрамиз, бироқ кечирасиз, жорий йилда эмас. Шу сабабли биз шаҳарнинг туристик жозибадорлигини камайтириб, меҳмонларга мурожаат йўллаяпмиз: келинг, соғлиғимиз, фарзандларимиз ва маҳаллий аҳоли соғлиғи ҳақида қайғурайлик. Бу йил бизнинг олдимизга келиш шарт эмас», — дейди шаҳар губернатори ўринбосари Евгений Елин.
Губернатор ўринбосарининг сўзларига кўра, туристик жозибадорликни камайтириш мақсадида, хусусан, ташриф буюрувчилар учун 30 декабрдан 3 январга қадар кафе ва ресторанларни ёпиш бўйича қарор юборилган.
Эслатиб ўтамиз, 2 декабрь куни Санкт-Петербург губернатори Александр Беглов шаҳар аҳолисидан одамлар кўп тўпланадиган жойга бормасликни сўраб, «койка-ўринлар ва шифокорлар чексиз эмас»лигини қўшимча қилган.
Россияда 2 декабрь куни қаторасига иккинчи кун коронавирусдан ўлимлар сони юқори бўлди — бир суткада 589 киши вафот этди. 25 345 кишига COVID-19 ташхиси қўйилди. Бу бир кун аввалги кўрсаткичдан 1057 кишига кўп. Мамлакатда касалланганларнинг умумий сони 2 347 401 нафарга етди. Янги аниқланган касалланиш ҳолатларининг энг кўпи Москва (5191 та) ва Санкт-Петербург (3684 та) шаҳарларида қайд этилган.
Изоҳ (0)