Efiopiya hukumati Tigrayda harbiy operatsiya tugatilganini ma’lum qildi
Efiopiya qurolli kuchlari Tigray isyonkor shtati poytaxti — Mekele shahri egallab olinganidan keyin jangovar harakatlarni to‘xtatdi. Bu haqda Efiopiya bosh vaziri Abiy Ahmad ma’lum qildi, deb yozadi “Kommersant”.
“Tigray mintaqasida harbiy operatsiyalarni tugatganimiz va to‘xtatganimizni ma’lum qilishdan xursandman. Federal politsiya TOMF (Tigray ozodlik milliy fronti) to‘dasini qo‘lga olish ishlarini olib borayotgan bir paytda, endi biz mintaqani qayta tiklash va gumanitar yordam ko‘rsatishga e’tibor qaratamiz”, — deb yozdi Ahmad Twitter’da.
Tigray shtati prezidenti Debretsion Gebremikael Reuters’ga ma’lum qilishicha, TOMF federal hukumatga qarshi kurashishni to‘xtatmoqchi emas. “Gap bizning o‘z taqdirimizni o‘zimiz belgilash huquqimiz haqida bormoqda”, — deb yozdi u. Reuters ikki diplomatga tayangan holda ma’lum qilishicha, TOMF kuchlari hukumat kuchlari tomonidan hujum boshlanishidan avval Mekeleni tark etgan bo‘lishi mumkin.
Efiopiyadagi qurolli nizo federal hukumat TOMFni harbiy bazaga hujum qilishda ayblaganidan keyin kuchayib ketdi. Nizo qurbonlarining aniq soni ma’lum emas. Reuters va AFP ta’kidlashicha, nizo tomonlari da’vo qilayotgan ma’lumotlarni tekshirish mushkul bo‘lmoqda, chunki mintaqada internet va telefon aloqasi ishlamayapti.
Eslatib o‘tamiz, Efiopiya shimolidagi Tigray viloyatida ommaviy qirg‘in sodir bo‘lgani haqida Amnesty International inson huquqlarini himoya qilish tashkiloti o‘z hisobotida ma’lum qilgandi.
