Germaniyalik shifokor pandemiyaning kutilmagan sababini ma’lum qildi

Germaniyalik epidemiolog Aleksandr Kekule ayni paytda dunyoda koronavirusning Italiyada paydo bo‘lgan shtammi tarqalayotganini ma’lum qildi. Shifokorning fikricha, Yevropada hech kim infeksiyaning xavfiga e’tibor qaratmagani sababli virus Italiya shimolida mutatsiyaga uchragan. Bu haqda “RIA Novosti” xabar berdi.

“Global pandemiya uchun ‘start o‘qi’ Italiyada otilgan”, — dedi mutaxassis.

Shifokorning bildirishicha, kasallanish holatlarining 99 foizidan ortig‘ida bemorlarni mutatsiya natijasida Italiya shimolida paydo bo‘lgan shtamm zararlamoqda. Shu bilan birga, Kekulening qayd etishicha, COVID-19’ning qo‘zg‘atuvchisi bo‘lgan SARS-Cov-2 virusi birinchi marta Uxanda paydo bo‘lgan.

Epidemiologning ta’kidlashicha, koronavirus Italiyada bir necha hafta davomida sezdirmasdan tarqalgan. Bu virusning mutatsiyaga uchrashiga va odamlarga yaxshiroq moslashishiga imkon bergan.

Kekule koronavirusning xavfi haqidagi ogohlantirishlarga e’tibor bermagan yevropaliklarning xatoga yo‘l qo‘yganini aytib o‘tdi. Uning so‘zlariga ko‘ra, hech kim xavfni jiddiy qabul qilmagan.

Shuningdek, shifokor Germaniya hukumatini ham tanqid qilgan. Uning eslatishicha, virusologlar bir ovozdan pandemiyaning ikkinchi to‘lqini yaqinlashayotgani haqida ogohlantirgan, biroq rasmiylar bunga tayyorlanmagan. Mutaxassisning aytishicha, COVID-19’ning qo‘zg‘atuvchisi kabi viruslar “kun sayin emas, balki soat sayin” tarqaladi, ayniqsa, yilning sovuq mavsumida.

Koronavirus pandemiyasi deyarli butun dunyoni egallab oldi. Hozirgi paytga qadar 60 milliondan ortiq odam koronavirus bilan kasallangan, ularning 1,4 milliondan ortig‘i vafot etgan. Eng ko‘p kasallanish holatlari AQSh, Hindiston va Braziliyada qayd etilgan.