Belarus prezidenti Aleksandr Lukashenkoning ma’lum qilishicha, u yangi konstitutsiya qabul qilinganidan keyin mamlakatga rahbarlik qilmaydi. Bu haqda “Interfaks” xabar berdi.
“Men hech qanday konstitutsiyani o‘zimga moslashtirmayman. Yangi konstitutsiya qabul qilingach, men siz bilan prezident sifatida ishlamayman”, — deya ma’lum qilgan Lukashenko.
Prezidentning va’da qilishicha, u qabul qilinadigan konstitutsiyani “kimdir soxtalashtirishiga yoki yangi konstitutsiya bo‘yicha bo‘lib o‘tadigan saylovni kimdir qalbakilashtirishiga” hech qachon yo‘l qo‘ymaydi. “Hatto agar bu men istagan narsa bo‘lmasligini bilsam ham. Nima uchun? Chunki belarus xalqi o‘tishi kerak bo‘lgan narsadan o‘tishi kerak. Yaxshisi hozir, urushsiz. Yomoni — urush boshlanganida”, — deya fikr bildirgan Belarus rahbari.
Shuningdek, Lukashenko parlamentga saylovni partiya ro‘yxatlari asosida o‘tkazish va shunga mos ravishda partiyalar tuzish haqidagi taklifga munosabat bildirdi. Uning ishonch bildirishicha, bunday tashabbuslarni amalga oshirish jamiyatning bo‘linib ketish va turli manfaatli guruhlarning paydo bo‘lish xavfini tug‘diradi. “Partiya ro‘yxatlari va boshqalar — buning barchasini boshqalarda ko‘rsang, bu yaxshi. Biroq agar siz shuni xohlasangiz va xalq bu uchun ovoz bersa, shunday ham bo‘ladi”, — dedi Lukashenko.
Shu bilan birga, Lukashenko “asosiy zarbani prezident va hukumat tuzilmasiga berayotgan” “namoyishchilar”ni tanqid qildi.
“Keling, demokratiya, hamma saylanishi kerak. Biz bundan Gorbachyov davrida o‘tganmiz. Biz hammani saylaganmiz — korxonalar rahbarlarini, direktorlarni. Oxirigacha saylay oldikmi? Mamlakatni ham yo‘qotdik, ittifoq ham parchalandi. Hozir bizga shu narsani tiqishtirmoqchi bo‘lishyapti”, — dedi davlat rahbari.
Izoh (0)