Rossiyada so‘nggi sutkada 27 543 kishiga COVID-19 tashxisi qo‘yildi, deb xabar bermoqda Meduza. Bir kun avval, 26-noyabr kuni 25 487 kishida koronavirus aniqlanib, kunlik kasallanishlar soni bo‘yicha yuqori ko‘rsatkich bo‘lgandi. Mamlakatda kasallanganlarning umumiy soni 2 215 533 nafarga yetdi.
Yangi aniqlangan kasallanish holatlarning eng ko‘pi — 7918 ta holat Moskva shahrida qayd etilgan bo‘lib, shaharda kasallanganlar soni sutkalik ortishi bo‘yicha rekord darajada bo‘ldi. Sankt-Peterburgda ham rekord qayd etildi — bir kecha-kunduzda 3687 kishida koronavirus aniqlandi. Moskva viloyatida esa 1058 ta holat qayd etilgan.
Mamlakatda so‘nggi sutkada — 496 kishi, pandemiya boshlanganidan buyon esa esa 38 558 kishi koronavirusdan vafot etgan. Bir kun avval COVID-19 bemorlarining 524 nafari vafot etib, kunlik o‘lim holatlari soni bo‘yicha pandemiya davridan buyon rekord ko‘rsatkich qayd etilgandi.Infeksiyadan sog‘ayganlar soni 1 712 174 nafarni tashkil etmoqda, shu jumladan, 26 682 nafari so‘nggi bir kecha-kunduzda tuzalib chiqqan. Bir kun avval 25 073 kishi sog‘aygandi.
“Rospotrebnadzor” ma’lumotlariga ko‘ra, mamlakatda koronavirusni aniqlash uchun so‘nggi 24 soatda 543 mingta (bir sutka oldin — 505 mingta), pandemiya boshlanganidan buyon esa 74,8 millionta test o‘tkazilgan.
Jons Hopkins ma’lumotlariga ko‘ra, Rossiya koronavirus qayd etilganlar soni bo‘yicha dunyoda AQSh, Hindiston, Braziliya va Fransiyadan keyin beshinchi o‘rinda. Ayni paytda koronavirusga chalinganlar soni dunyoda 61 milliondan oshgan.
Izoh (0)