Беларусь президенти Александр Лукашенконинг маълум қилишича, у янги конституция қабул қилинганидан кейин мамлакатга раҳбарлик қилмайди. Бу ҳақда «Интерфакс» хабар берди.
«Мен ҳеч қандай конституцияни ўзимга мослаштирмайман. Янги конституция қабул қилингач, мен сиз билан президент сифатида ишламайман», — дея маълум қилган Лукашенко.
Президентнинг ваъда қилишича, у қабул қилинадиган конституцияни «кимдир сохталаштиришига ёки янги конституция бўйича бўлиб ўтадиган сайловни кимдир қалбакилаштиришига» ҳеч қачон йўл қўймайди. «Ҳатто агар бу мен истаган нарса бўлмаслигини билсам ҳам. Нима учун? Чунки беларус халқи ўтиши керак бўлган нарсадан ўтиши керак. Яхшиси ҳозир, урушсиз. Ёмони — уруш бошланганида», — дея фикр билдирган Беларусь раҳбари.
Шунингдек, Лукашенко парламентга сайловни партия рўйхатлари асосида ўтказиш ва шунга мос равишда партиялар тузиш ҳақидаги таклифга муносабат билдирди. Унинг ишонч билдиришича, бундай ташаббусларни амалга ошириш жамиятнинг бўлиниб кетиш ва турли манфаатли гуруҳларнинг пайдо бўлиш хавфини туғдиради. «Партия рўйхатлари ва бошқалар — бунинг барчасини бошқаларда кўрсанг, бу яхши. Бироқ агар сиз шуни хоҳласангиз ва халқ бу учун овоз берса, шундай ҳам бўлади», — деди Лукашенко.
Шу билан бирга, Лукашенко «асосий зарбани президент ва ҳукумат тузилмасига бераётган» «намойишчилар»ни танқид қилди.
«Келинг, демократия, ҳамма сайланиши керак. Биз бундан Горбачёв даврида ўтганмиз. Биз ҳаммани сайлаганмиз — корхоналар раҳбарларини, директорларни. Охиригача сайлай олдикми? Мамлакатни ҳам йўқотдик, иттифоқ ҳам парчаланди. Ҳозир бизга шу нарсани тиқиштирмоқчи бўлишяпти», — деди давлат раҳбари.
Изоҳ (0)