Vazirlar Mahkamasi huzuridagi O‘simliklar karantini davlat inspeksiyasi Rossiya Veterinariya va fitosanitariya bo‘yicha federal xizmati tomonidan mamlakatga import qilinishi vaqtincha taqiqlangan pomidor va qalampir mahsulotlari yuzasidan o‘rganish boshladi. Bu haqda inspeksiyasi matbuot xizmati rahbari Durdona Ochilovaga tayanib, “Kun.uz” xabar berdi.
Avvalroq, Rossiyaning Veterinariya va fitosanitariya bo‘yicha federal xizmatining (“Rosselxoznadzor”) O‘zbekistondan Rossiyaga qalampir va pomidor mahsulotlarining kirib kelishi uchun vaqtinchalik taqiq qo‘yilgani to‘g‘risida xabar berilgandi.
Ta’kidlanishicha, ushbu taqiq faqatgina Farg‘ona viloyatidan eksport qilinuvchi mahsulotlarga taalluqli.
Ma’lum qilinishicha, birlamchi o‘rganishlar davomida Farg‘ona viloyatidan yuborilgan bulg‘or qalampir (4 kilogramm) va pomidor (6 kilogramm) mahsulotlarining namunalarida “Rosselxoznadzor” laboratoriya tahlillariga ko‘ra, Tomato brown rugose fruit virus virusi aniqlangan.
“Mazkur xabardan so‘ng Vazirlar Mahkamasi huzuridagi O‘simliklar karantini davlat inspeksiyasi rahbariyati tomonidan ‘Rosselxoznadzor’ rahbariyati bilan tezkor ravishda onlayn muzokaralar o‘tkazildi. Muzokaralar natijasida, mazkur taqiqni qisqa muddatlarda yechish maqsadida mahsulotlar yetishtirilgan hududdagi barcha issiqxona va ekin maydonlarida o‘simliklar karantini nazorati o‘tkazilishi va mazkur kasallikni hamkorlikda o‘rganishga kelishildi”, — deya ma’lumot beradi Durdona Ochilova.
Qayd etilishicha, Tomato brown rugose fruit virus, ya’ni pomidorning jigarrang burishish virusi shu paytgacha O‘zbekiston hududida aniqlanmagan.
Mazkur holat yuzasidan O‘simliklar karantini davlat inspeksiyasi vakillaridan maxsus ishchi guruh tuzilib, shu kunning o‘zida Farg‘ona viloyatiga yuborilgan.
Investitsiyalar va tashqi savdo vazirligining ma’lum qilishicha, pomidor mevalarining jigarrang burishishi viruslari, pomidorda dog‘ paydo bo‘lishi va pepino mozaikasi Yevrosiyo iqtisodiy komissiyasi kengashi qarori bilan tasdiqlangan Yevrosiyo iqtisodiy ittifoqi karantin obyektlarining yagona ro‘yxatida mavjud emas.
“Rosselxoznadzor” Rossiyada issiqxonada sabzavot yetishtirish uchun ushbu viruslar zararli ekanini hisobga olib, 2020-yil 27-iyuldan boshlab vaqtincha karantin fitosanitariya chorasi sifatida eksport qiluvchi mamlakatlardan Rossiyaga keluvchi pomidor va qalampir urug‘lari, ko‘chatlari va mevalarida uning mavjud bo‘lmasligi talabini kiritgan.
Talab ushbu viruslar Yevrosiyo iqtisodiy ittifoqi karantin obyektlarining yagona ro‘yxatiga kiritilguniga qadar amal qiladi. Shu bilan birga, idora ko‘rsatilgan zararkunanda organizmlarni yagona ro‘yxatga kiritish masalasini zudlik bilan ko‘rib chiqishni so‘rab, Yevrosiyo iqtisodiy komissiyasiga murojaat qilgan.
Avvalroq Investitsiyalar va tashqi savdo vazirligi Farg‘onada yetishtirilgan pomidor va qalampirning Rossiyaga olib kirilishiga qo‘yilgan taqiqqa izoh berib, ushbu masala yuzasidan hozirda “Rosselxoznadzor” bilan konsultatsiya o‘tkazilayotganini ma’lum qilgandi.
Izoh (0)