Коррупцияга қарши курашиш агентлиги директори Акмал Бурҳонов «Севимли» телеканалида эфирга узатиладиган «Замон» кўрсатувига берган интервьюсида Ўзбекистондаги амалдорлар хизмат автомашинасидан ўз эҳтиёжлари йўлида фойдаланиш ҳолатлари кўп кузатилиши ва бу каби ҳолатлар эндиликда тартибга солинишини маълум қилди.
«Хизмат автотранспортларидан фойдаланишда ҳам аниқ чекловлар қўйилмоқда. Афсуски, кўп ҳолатларда шахсий, оилавий ишларида, фарзандини мактабга олиб бориш ёки бозордан харидларни амалга оширишда хизмат автотранспортидан фойдаланиш оддий ҳол бўлиб қолган. ‘Бу менинг автотранспортим’ деган қанақадир тушунча пайдо бўлган», — дейди Акмал Бурҳонов.
Унинг таъкидлашича, қарор билан бу каби ҳолатларни тартибга солиш режалаштирилган.
Шу билан бирга, Коррупцияга қарши курашиш агентлиги директорининг ўзи ҳукумат томонидан берилган навбатчи автомобилдан фойдаланишини, агентлик раҳбари учун махсус автомашина сотиб олинмаганини маълум қилган.
«Ҳукумат фойдаланиш учун бизга ижарага машина тақдим этилган, биз шундай фойдаланамиз», — дейди Бурҳонов.
Аввалроқ Акмал Бурҳонов мансабдор шахслар пандемия шароитида давлат маблағларининг самарали сарфланиши нақадар муҳим эканлигини тўла англаб етмаётгани, қиммат нархлардаги хизмат автотранспортлари харид қилинаётганига муносабат ҳам билдирганди. Шунингдек, Президентнинг янги қарорига кўра, туман ҳокимларига нархи 267,5 миллион сўмдан юқори хизмат автомобили сотиб олиш тақиқланиши мумкинлиги маълум қилинган эди.
Эслатиб ўтамиз, Эстония президенти Керсти Калюлаид 21 ноябрь куни фарзандларини хизмат машинасида мактабга ва қўшимча дарсларга олиб борган таълим ва фан вазири Майлис Репсни ишдан бўшатган эди.
Изоҳ (0)