Estoniya prezidenti Kersti Kalyulaid 21-noyabr kuni farzandlarini xizmat mashinasida maktabga va qo‘shimcha darslarga olib borgan ta’lim va fan vaziri Maylis Repsni ishdan bo‘shatdi, deya xabar qilmoqda “Interfaks”.

Maylis Reps

Foto: Proceso

Vazir 20-noyabr kuni ommaviy axborot vositalarining bosimi ostida iste’foga chiqish arizasini topshirdi. Ta’kidlanishicha, vazir farzandlarini xizmat mashinasida maktabga va qo‘shimcha darslarga olib borgan.

“Men vazir va ona vazifalarini birlashtirib yuborganim uchun katta bosimga duch keldim. Xato qilganimni tan olaman va kechirim so‘rayman”, – deb yozadi Reps ijtimoiy tarmoqlarda.

U o‘z farzandlariga o‘sishi va tarbiyalanishi mumkin bo‘lgan osoyishta muhitni taqdim qilmoqchi ekanligini ta’kidladi. Shuningdek, u ish va oilaviy hayotdagi xatolar uchun javobgarlikni o‘z zimmasiga olishga tayyor ekanligini bildirdi.

Bosh vazir Yuri Ratas hukumat “o‘z sohasini yaxshi tushunadigan, o‘z ishiga fidoyi bo‘lgan nihoyatda mehnatga layoqatli vazirni” tark etishidan afsus bildirdi. Uning so‘zlariga ko‘ra, Reps Estoniyada to‘rt marta ta’lim va fan vaziri bo‘lib ishlagan, parlament a’zosi va Markazning yetakchi hukmron partiyasi kengashi a’zosi bo‘lgan. Shu bilan birga, u Repsning qarorini tushunishini va to‘g‘ri qabul qilishini aytdi.

Ma’lum qilinishicha, Estoniyaning Ohtuleht nashri Reps va uning oilasini uch kun davomida kuzatib bordi. Shundan so‘ng vazirning bolalari xizmat mashinasida maktabga va qo‘shimcha guruhlarga olib ketilgani aks etgan fotosuratlar chop etildi.

Vazir lavozimidan ketganidan keyin parlament a’zosi sifatida ishlashni davom ettiradi.

Avvalroq Erdo‘g‘on turk lirasining keskin qadrsizlanishi sababli Markaziy bank rahbarini ishdan bo‘shatgani hamda Sherzod Shermatov boshchiligidagi yig‘ilishda birorta bitiruvchisi OTMga kirmagan Qashqadaryodagi 20 ta maktab direktori ishdan olingani haqida xabar berilgandi.