Buxoro viloyatida avtomobilining texnik sozligini tekshirish uchun mashinadan tushgan haydovchini Isuzu yuk mashinasi urib ketdi. Bu haqda “Sevimli” telekanalining “Zamon.uz” dasturida xabar qilindi.
Qayd etilishicha, G‘uzor–Buxoro–Nukus–Beynau xalqaro ahamiyatga ega avtomobil yo‘lining 328-kilometrida Lacetti avtomobili haydovchisi mashinaga texnik shikast yetganligi tufayli yo‘l chetiga to‘xtagan. Haydovchi avtomashinadan tushib, yo‘lning qatnov qismiga chiqib ketishi natijasida Isuzu rusumli transport vositasi mazkur fuqaroni urib yuborgan.
Oqibatda Lacetti avtomashinasi haydovchisi og‘ir tan jarohati olib, voqea joyida vafot etgan.
YTH sodir bo‘lgan joyga mas’ullar kelib hodisa sababini o‘rgangan. Ushbu yo‘lda YTHlarning aksari haydovchilarning uxlab qolishi sabab sodir bo‘lishi inobatga olinib, kelgusida haydovchilar uchun qisqa muddatli dam olish maskanlari tashkil etilishi rejalashtirildi.
Shuningdek, xalqaro ahamiyatdagi avtomobil yo‘lida YPX xodimlarining 5 ta mobil ekipajlari tun-u kun xizmat olib borishi ta’minlandi.
Avvalroq Toshkentda Isuzu avtobusi simyog‘ochga urilishi oqibatida besh kishi jarohatlangani, Oqdaryoda MAN va Isuzu yuk mashinalari to‘qnashishi natijasida Isuzu ichidagi 2 nafar yo‘lovchi shifoxonada vafot etgani hamda Jizzaxda yo‘lning muzlashi oqibatida sodir bo‘lgan ikki YTHda haydovchi va yo‘lovchi vafot etgani haqida xabar berilgan edi.
Izoh (0)