Estoniyaning Kuressaare shahrida joylashgan kiyim-kechaklar bilan savdo qiluvchi do‘konda noodatiy tovar paydo bo‘ldi — “Kelajakka qaytib” kinofranshizasi orqali mashhurlikka erishgan DeLorean DMC-12 avtomobili. Seriyali sportkar narxi 55 ming yevroni tashkil etmoqda, deb xabar beradi Motor.
DeLorean Kuressaare shahridagi Insect nomli do‘konda sotuvga qo‘yilgan. Geenius nashri jurnalistlari eshiklari yuqoriga ko‘tariladigan avtomobilga do‘konning kirish qismida duch kelgan. Biroq do‘kon xodimlari ushbu nusxa tarixiga oid biror ma’lumot bera olmagan.
DMC-12 DeLorean Motor Company’ning yagona modeli bo‘lib, 1981—1983-yillar oralig‘ida Shimoliy Irlandiyada ishlab chiqarilgan. Ikki yil ichida 8,5 mingdan ortiq nusxa yig‘ilgan. Sportkar Robert Zemekisning “Kelajakka qaytib” ilmiy-fantastik trilogiyasi sabab mashhurlikka erishgan.
Hozirda Irlandiyadagi avtomobilsozlik kompaniyasiga to‘g‘ridan to‘g‘ri aloqasi bo‘lmagan Texasdagi DeLorean Motor Company kichik seriyali DMC-12’ni ishlab chiqarishni yo‘lga qo‘ymoqchi. Modelni yig‘ish ishlari to‘g‘risida 2016-yilda e’lon qilingan, biroq AQSh Yo‘l harakati xavfsizligi milliy administratsiyasi talablari sabab to‘xtab qolgan.
Klassik DeLorean’ga 132 ot kuchi va 207 Nm aylanuvchi momentga ega 2,85 litrli V6 o‘rnatilgan. Kupe soatiga 100 kilometr tezlikka 10,5 soniyada erishadi, maksimal tezligi — 177 km/soat.
Avvalroq AQShdagi Skipco auksionida “Kelajakka qaytib” filmidagi De Lorean DMC-12, “Arvohlar ovchilari”dagi Ecto-1, shuningdek, “Betmobil” nusxalari sotuvga qo‘yilgani to‘g‘risida xabar berilgandi.
Izoh (0)