Россия ветеринария ва фитосанитария назорати бўйича федерал хизмати 26 ноябрь куни Фарғона вилоятида етиштириладиган помидор ва қалампир маҳсулотларининг мамлакат ҳудудига олиб кирилишига тақиқ қўйгани тўғрисида хабар берилганди. Spot’нинг Ўзбекистон Инвестициялар ва ташқи савдо вазирлигига таяниб ёзишича, ушбу масала юзасидан ҳозирда «Росселхознадзор» билан консультация ўтказилмоқда.
Россия томонига кўра, Фарғона вилоятида етиштирилган помидорда жигарранг буришиш вируси (Tomato brown rugose fruit virus —ToBRFV) аниқланганлиги сабабли чекловлар жорий этилган.
«Ҳозирги вақтда Вазирлар Маҳкамаси ҳузуридаги Ўсимликлар карантини давлат инспекцияси ва Ўзбекистоннинг Россиядаги элчихонаси билан биргаликда ‘Росселхознадзор’ билан мазкур масала бўйича маслаҳатлашувлар ўтказилмоқда», — дейилади хабарда.
Қайд этилишича, «Росселхознадзор» томонидан жорий этилган тақиқлар Ўзбекистоннинг барча ишлаб чиқарувчиларига нисбатан қўлланилмайди ва фақат Фарғона вилоятидан келтирилган маҳсулотларга тегишлидир.
«Россия томони билан маслаҳатлашувлар давом этмоқда. Тақиқларни яқин вақтларда бекор қилиш бўйича чоралар кўрилмоқда», — дейилади хабарда.
Аввалроқ Қирғизистонда ЕОИИга аъзо бўлмаган мамлакатларга қорамол экспортини тақиқлагани тўғрисида хабар берилганди.
Изоҳ (0)