Janubiy Koreya harbiylari 2020-yilning noyabr oyi boshida KXDR bilan chegarani piyoda kesib o‘tgan vaqtida qo‘lga olingan Shimoliy Koreya fuqarosiga nisbatan tergovni davom ettirmoqda. Bu haqda Meduza xabar berdi.
Janubiy Koreyaning The Korea Herald gazetasi yozishicha, qo‘lga olingan erkak gimnastikachi bo‘lgani hamda KXDR va Janubiy Koreya o‘rtasidagi chegarada uch metrli to‘siqdan sakrab o‘tishga muvaffaq bo‘lganini aytgan.
The Korea Herald gazetasi manbasining ta’kidlashicha, shimollik erkak aytgan so‘zlarni isbotlash uchun u ikki marta sakrashga majbur qilingan. Sakrash chegaradagi to‘siqda yoki boshqa bir joyda amalga oshirilganiga aniqlik kiritilmagan.
Gazetaning ma’lumotlariga ko‘ra, KXDR fuqarosi 20 yoshda. Janubiy Koreya harbiylari uning qochib kelish sababi va harakat yo‘nalishini o‘rganmoqda. Shuningdek, chegara to‘sig‘idagi datchiklar nima sababdan signalizatsiyani ishlatmaganiga aniqlik kiritilmoqda.
Bundan tashqari, harbiy rahbariyat chegarani kesib o‘tish bilan bog‘liq hodisa uchun javobgar bo‘lgan bo‘linmaga nisbatan olib borilgan tekshiruv natijalarini hali ma’lum qilmagan.
Izoh (0)