Germaniya poytaxti Berlin shahrida 25-noyabr kuni ertalab mamlakat kansleri Angela Merkelning ofisi darvozasiga avtomobil kelib urildi. Avtomobilga nemis tilida “Globallashuv siyosatini to‘xtating” va “Sizlar bolalar va keksalarning yaramas qotilisiz” yozuvlari tushirilgan. Bu haqda Meduza xabar berdi.
Dastlabki ma’lumotlarga ko‘ra, hodisa oqibatida hech kim jabrlanmagan. Mashina va darvozaga sezilarsiz zarar yetgan. Avtomobil haydovchisi qo‘lga olingan. Hodisa joyiga politsiya, o‘t o‘chiruvchilar va jurnalistlar yetib kelgan.
Huquqni muhofaza qiluvchi organlarning ma’lum qilishicha, hodisa ehtimoliy terakt sifatida ko‘rib chiqilmayapti.
Reuters’ning xabar berishicha,. 25-noyabr kuni Angela Merkel federal yerlar rahbarlari bilan mamlakatdagi koronavirus bilan bog‘liq vaziyatni videomajlisda muhokama qilishi rejalashtirilgan.
Bild nashrining yozishicha, Volkswagen markasidagi xuddi shunday mashina 2014-yilning fevral oyida ham Merkelning ofisi darvozasiga urilgan. O‘shanda mashinaga nemis tilida “Odamlarni o‘ldirayotgan iqlim o‘zgarishiga yo‘q”, degan yozuv tushirilgandi.
Izoh (0)