Germaniya federal kansleri Angela Merkel 25-noyabr kuni kechqurun Germaniyada koronavirus tufayli joriy qilingan cheklovlar yanvargacha uzaytirilishini ma’lum qildi, deb yozadi Meduza. Bu haqda u Germaniya federal o‘lkalari rahbarlari bilan yetti soat davom etgan muzokaralardan keyin o‘tkazilgan matbuot anjumanida aytib o‘tdi.
Cheklovlar 20-dekabrgacha amal qiladi. “Ammo biz infeksiya tarqalish darajasi juda yuqori bo‘lgani sababli, agar bizda kutilmaganda pasayish kuzatilmasa, cheklovlar yanvar boshigacha amal qilishi kerak, deb o‘ylayapmiz”, — dedi Merkel.
Cheklovlar 2-noyabrda kiritilgan va ular dastlab oy oxirigacha amal qilishi ko‘zda tutilgan edi. O‘shanda restoranlar, barlar, teatrlar, kinoteatrlar, konsert zallari yopildi.
Keyinroq cheklov choralari kengaytirildi. Xususan, do‘konlarga borish qoidalari qat’iylashtirildi — har 10 m² maydonga bir nafar xaridorni kirgizish mumkin. Aholiga himoya niqoblarini taqish, shu jumladan, ularni do‘konlar yonida va avtoturargohlarda taqish majburiyati yuklandi. Bundan tashqari, 1-dekabrdan boshlab shaxsiy uchrashuvlarda ikkita uy xo‘jaligidan ko‘pi bilan besh kishi qatnashishi mumkin bo‘ldi (hozir — 10 kishi).
23-dekabrdan 1-yanvargacha, ya’ni Rojdestvo bayrami va Yangi yil arafasi nishonlanadigan davrda qoidalar biroz susaytiriladi. Shaxsiy uchrashuvlarda uy xo‘jaliklari sonidan qat’i nazar, ko‘pi bilan 10 kishi qatnasha oladi. Shuningdek, hukumat mushakbozlik qilishdan voz kechishni tavsiya etdi hamda ularni gavjum maydon va ko‘chalarda taqiqladi. Hukumat kompaniyalarni shu davrda o‘z xodimlarini masofadan ishlashga o‘tkazishga chaqirdi. Germaniya tog‘-chang‘i kurortlari 10-yanvargacha yopiq bo‘ladi.
Ayni vaqtda, Germaniyaga kelgan odamlar rioya qilishi kerak bo‘lgan majburiy karantin muddati 14 kundan 10 kungacha qisqartirildi.
25-noyabr kuni Germaniyada koronavirusdan vafot etganlar soni bo‘yicha sutkalik antirekord qayd etildi — bir kunda 410 kishi vafot etdi. Bungacha maksimal raqam aprelda kuzatilgan edi. Pandemiya boshidan buyon Germaniyada 14 771 kishi kasallikdan ko‘z yumdi.
Germaniyada jami 961 ming kishi koronavirusga chalingan, sog‘ayganlar soni esa 656 mingdan oshdi.
Eslatib o‘tamiz, Buyuk Britaniyada 2-dekabr kuni koronavirus tufayli joriy qilingan umummilliy karantin tugaydi va u mahalliy cheklovlar bilan o‘rin almashadi. Fransiya hukumati esa 28-noyabrdan koronavirus infeksiyasi tufayli joriy qilingan cheklovlarni bosqichma-bosqich bekor qilishni boshlaydi.
Izoh (0)