Германияда коронавирус туфайли жорий қилинган карантин муддати узайтирилди

Германия федерал канцлери Ангела Меркель 25 ноябрь куни кечқурун Германияда коронавирус туфайли жорий қилинган чекловлар январгача узайтирилишини маълум қилди, деб ёзади Meduza. Бу ҳақда у Германия федерал ўлкалари раҳбарлари билан етти соат давом этган музокаралардан кейин ўтказилган матбуот анжуманида айтиб ўтди.

Чекловлар 20 декабргача амал қилади. «Аммо биз инфекция тарқалиш даражаси жуда юқори бўлгани сабабли, агар бизда кутилмаганда пасайиш кузатилмаса, чекловлар январь бошигача амал қилиши керак, деб ўйлаяпмиз», — деди Меркель.

Чекловлар 2 ноябрда киритилган ва улар дастлаб ой охиригача амал қилиши кўзда тутилган эди. Ўшанда ресторанлар, барлар, театрлар, кинотеатрлар, концерт заллари ёпилди.

Кейинроқ чеклов чоралари кенгайтирилди. Хусусан, дўконларга бориш қоидалари қатъийлаштирилди — ҳар 10 м² майдонга бир нафар харидорни киргизиш мумкин. Аҳолига ҳимоя ниқобларини тақиш, шу жумладан, уларни дўконлар ёнида ва автотураргоҳларда тақиш мажбурияти юкланди. Бундан ташқари, 1 декабрдан бошлаб шахсий учрашувларда иккита уй хўжалигидан кўпи билан беш киши қатнашиши мумкин бўлди (ҳозир — 10 киши).

23 декабрдан 1 январгача, яъни Рождество байрами ва Янги йил арафаси нишонланадиган даврда қоидалар бироз сусайтирилади. Шахсий учрашувларда уй хўжаликлари сонидан қатъи назар, кўпи билан 10 киши қатнаша олади. Шунингдек, ҳукумат мушакбозлик қилишдан воз кечишни тавсия этди ҳамда уларни гавжум майдон ва кўчаларда тақиқлади. Ҳукумат компанияларни шу даврда ўз ходимларини масофадан ишлашга ўтказишга чақирди. Германия тоғ-чанғи курортлари 10 январгача ёпиқ бўлади.

Айни вақтда, Германияга келган одамлар риоя қилиши керак бўлган мажбурий карантин муддати 14 кундан 10 кунгача қисқартирилди.

25 ноябрь куни Германияда коронавирусдан вафот этганлар сони бўйича суткалик антирекорд қайд этилди — бир кунда 410 киши вафот этди. Бунгача максимал рақам апрелда кузатилган эди. Пандемия бошидан буён Германияда 14 771 киши касалликдан кўз юмди.

Германияда жами 961 минг киши коронавирусга чалинган, соғайганлар сони эса 656 мингдан ошди.

Эслатиб ўтамиз, Буюк Британияда 2 декабрь куни коронавирус туфайли жорий қилинган умуммиллий карантин тугайди ва у маҳаллий чекловлар билан ўрин алмашади. Франция ҳукумати эса 28 ноябрдан коронавирус инфекцияси туфайли жорий қилинган чекловларни босқичма-босқич бекор қилишни бошлайди.