Fransiya Senati Tog‘li Qorabog‘ni tan olish to‘g‘risidagi rezolyutsiyani qabul qilish uchun ovoz berdi

Fransiya senatorlari mamlakat hukumatini Tog‘li Qorabog‘ Respublikasini tan olishga chaqiruvchi rezolyutsiya qabul qildi. Bir kishi rezolyutsiyaga qarshi ovoz berdi, 305 kishi uni qo‘llab-quvvatladi. Bu haqda TJournal xabar berdi.

Fransiya Senati Ozarbayjon qurolli kuchlari va ularning tarafdorlarini 27-sentabrdan beri mintaqada o‘tkazilgan harbiy harakatlar natijasida tortib olingan hududlardan zudlik bilan olib chiqib ketishga chaqirdi. Senat Turkiya hukumati va chet ellik yollanma askarlar ko‘magida amalga oshirilgan Ozarbayjonning harbiy tajovuzini qoraladi.

Shuningdek, senatorlar Tog‘li Qorabog‘da sodir etilgan harbiy jinoyatlar yuzasidan xalqaro tergov o‘tkazish zarur deb hisoblaydi. Tashabbus mualliflari hukumatning mojaroni uzoq muddatli hal qilish bo‘yicha Minsk guruhi doirasidagi muzokaralarni qayta tiklashga ko‘mak berishini talab qilmoqda.

Senat qarorida 1994-yilda belgilangan chegaralarni tiklash, Armaniston aholisi xavfsizligi va ko‘chirilgan odamlarning qaytib kelish huquqini ta’minlash talab qilingan. Fransuz qonunchilarining fikriga ko‘ra, respublikani tan olish Turkiyaning “butun Fransiya va Yevropa xavfsizligiga tahdid soladigan” ekspansiya siyosatining oldini oladi.

Armaniston bosh vaziri Nikol Pashinyan ushbu rezolyutsiyani “tarixiy qaror” deb atadi. Uning so‘zlariga ko‘ra, Tog‘li Qorabog‘ni tan olish xalqaro kun tartibiga kiradi.

Ozarbayjon prezidentining yordamchisi Hikmet Gadjiyevning aytishicha, mamlakat rasmiylari ushbu qarorga “oddiy qog‘oz varag‘i” kabi qaramoqda. “Tor siyosiy ambitsiyalar nomi bilan qabul qilingan ushbu qog‘oz xalqaro huquqni, BMT ustavini va BMT Xavfsizlik Kengashining tegishli qarorlarini qo‘pol ravishda buzish bilan birga, Fransiyaning niyatlari va obyektiv faoliyati bilan bog‘liq jiddiy savollarni tug‘dirmoqda”, — dedi Gadjiyev.

Fransiya Tashqi ishlar vazirligi davlat kotibi Jan-Batist Lemuanning fikricha, Fransiyaning Tog‘li Qorabog‘ mustaqilligini bir tomonlama tan olishi hech kimga foydali bo‘lmaydi. Uning so‘zlariga ko‘ra, bu qadam Fransiya hukumati, Yerevan va Parijning boshqa sheriklari siyosatini aks ettirmaydi.

10-noyabr kuni Armaniston bosh vaziri Rossiya va Ozarbayjon rahbarlari bilan birgalikda o‘t ochishni to‘xtatish va tinchlikparvar kuchlarni Tog‘li Qorabog‘ga kiritish to‘g‘risida uch tomonlama bitim imzoladi. Armanistonda bu taslim bo‘lish deb qabul qilindi. 11-noyabr kuni Pashinyanning iste’fosini talab qilgan keng miqyosli namoyishlar bo‘lib o‘tdi.