Ijtimoiy tarmoqlarda Toshkent viloyatining Qibray va Yuqorichirchiq tumanlarini Toshkent shahri bilan bog‘lovchi yangi qurilgan avtomobil yo‘lida bir guruh haydovchilar tungi vaqtda xavfli holatni yuzaga keltirgan holda poyga uyushtirgani aks etgan video tarqaldi. Toshkent viloyati IIBB YHXB tomonidan ushbu holatga oydinlik kiritildi.
Ma’lum bo‘lishicha, mazkur noqonuniy poyga uch nafar haydovchi tomonidan uyushtirilgan. Ular harakatlanish xavfsizligi talablariga zid ravishda o‘zaro kelishuv asosida poyga uyushtirgan.
Poygada 1993-yilda tug‘ilgan, Toshkent shahrining Mirobod tumanida yashovchi Muzaffar Rashidov davlat raqam belgisi 01 T 297 SV bo‘lgan Audi, 1992-yilda tug‘ilgan, Toshkent shahrining Chilonzor tumanida yashovchi Toshkenboy Shintemirov davlat raqam belgisi 01 G 008 AB bo‘lgan Malibu-2 va Toshkent shahridagi “FULL COTTON” MChJda ishlovchi, 1992-yilda tug‘ilgan Acar Arda Kemal o‘ziga biriktirilgan, davlat raqam belgisi 01 490 NNA bo‘lgan Maserati avtomobilida ishtirok etgan.
Toshkent viloyati YHXB tomonidan ushbu videoda aks etgan barcha transport vositalari aniqlanib, ularning haydovchilari bilan profilaktik suhbat o‘tkazilgan. Ularga nisbatan Ma’muriy javobgarlik to‘g‘risidagi kodeksining 128-5-moddasining 2-qismiga (transport vositalari haydovchilarining xalaqit berishi yoki avariya holatini yuzaga keltirishi, yo‘lning qarama-qarshi harakatlanish uchun mo‘ljallangan tomoniga yoki bo‘lagiga chiqishi) asosan bayonnoma rasmiylashtirildi.
Izoh (0)