Ижтимоий тармоқларда Тошкент вилоятининг Қибрай ва Юқоричирчиқ туманларини Тошкент шаҳри билан боғловчи янги қурилган автомобиль йўлида бир гуруҳ ҳайдовчилар тунги вақтда хавфли ҳолатни юзага келтирган ҳолда пойга уюштиргани акс этган видео тарқалди. Тошкент вилояти ИИББ ЙҲХБ томонидан ушбу ҳолатга ойдинлик киритилди.
Маълум бўлишича, мазкур ноқонуний пойга уч нафар ҳайдовчи томонидан уюштирилган. Улар ҳаракатланиш хавфсизлиги талабларига зид равишда ўзаро келишув асосида пойга уюштирган.
Пойгада 1993 йилда туғилган, Тошкент шаҳрининг Миробод туманида яшовчи Музаффар Рашидов давлат рақам белгиси 01 Т 297 CB бўлган Audi, 1992 йилда туғилган, Тошкент шаҳрининг Чилонзор туманида яшовчи Тошкенбой Шинтемиров давлат рақам белгиси 01 G 008 АB бўлган Malibu-2 ва Тошкент шаҳридаги «FULL COTTON» МЧЖда ишловчи, 1992 йилда туғилган Аcар Арда Кемал ўзига бириктирилган, давлат рақам белгиси 01 490 HHA бўлган Maserati автомобилида иштирок этган.
Тошкент вилояти ЙҲХБ томонидан ушбу видеода акс этган барча транспорт воситалари аниқланиб, уларнинг ҳайдовчилари билан профилактик суҳбат ўтказилган. Уларга нисбатан Маъмурий жавобгарлик тўғрисидаги кодексининг 128-5-моддасининг 2-қисмига (транспорт воситалари ҳайдовчиларининг халақит бериши ёки авария ҳолатини юзага келтириши, йўлнинг қарама-қарши ҳаракатланиш учун мўлжалланган томонига ёки бўлагига чиқиши) асосан баённома расмийлаштирилди.
Изоҳ (0)