Futbol bo‘yicha Coca-Cola Superliga 24-turining markaziy o‘yinida “Nasaf” va “Paxtakor” jamoalari 25-noyabr, chorshanba kuni o‘zaro bahs yuritdi.
Uchrashuvning 6-daqiqasidayoq Sharof Muhitdinov o‘zining super goli bilan qarshiliklarni oldinga olib chiqdi. Tanaffusga qadar har ikki jamoada yana bir qator imkoniyatlar yuzaga keldi. Biroq minimal hisob birinchi bo‘lim yakuniga qadar saqlanib qoldi.
Ikkinchi bo‘limda maydon egalari ikkita to‘p kiritgan holda hisobni yirik ko‘rinishga olib keldi. 56-daqiqadagi chiroyli kombinatsiyadan keyin Darko Stanoyevich jamoasining ikkinchi golini urgan bo‘lsa, oradan o‘n daqiqa o‘tib Akmal Mozgovoy yakuniy hisobni o‘rnatdi — 3:0.
Gollar videosini bu yerda ko‘rish mumkin — video
Shu tariqa ushbu g‘alabadan keyin “Nasaf” ochkolarini 49 taga yetkazib oldi va uchinchi o‘rindagi OKMKni (45) to‘rt ochkoga ortda qoldirmoqda. Keyingi turdagi g‘alaba yoki olmaliqliklarning ochko yo‘qotishi evaziga “Nasaf” kumush medallarini naqd qilib qo‘yishi mumkin. “Paxtakor” (59) esa o‘tgan turda chempionlik masalasini hal qilib qo‘ygandi.
“Nasaf” keyingi turda “Bunyodkor” bilan bahs yuritsa, “Paxtakor” poytaxt derbisida “Lokomotiv” bilan kuch sinashadi.
Coca-Cola Superliga
24-tur bahsi
25-noyabr, chorshanba
“Nasaf” — “Paxtakor” 3:0
Gollar: 1:0 – 6 Muhitdinov, 2:0 – 56 Stanoyevich, 3:0 – 66 Mozgovoy.“Nasaf”: Abduvohid Ne’matov, Husniddin Aliqulov, G‘olib G‘aybullayev, Bobur Abduholiqov (Javohir Esonqulov, 87), Sharof Muhitdinov (Shohmalik Komilov, 87), Jo‘rabek Mannonov, Islom Kenjaboyev (Husayn Norchayev, 75), Akmal Mozgovoy (Abubakrizo Turdaliyev, 90), Oybek Bozorov, Marko Stanoyevich (Dilshod Rahmatullayev,75), Umar Eshmurodov.
“Paxtakor”: Eldor Suyunov, Hojiakbar Alijonov, Anzur Ismoilov, Sherzod A’zamov, Farruh Sayfiyev, Abror Ismoilov, Sardor Sobirxo‘jayev, Doston Hamdamov, Dragan Cheran, Asadbek Sobirjonov (Hojimat Erkinov, 61), Igor Sergeyev.
Ogohlantirish: Alijonov (39), G‘aybullayev (39), Mozgovoy (70), Ismoilov (72).
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)