Futboldan tashqari qiziqishlar, mashinalar va bir uyum reklama shartnomalari. Benazir Joze Mourinyo qanday hayot kechiradi?

Odatda murabbiylar omma bilan ko‘p muloqot qilmaydigan, o‘z xayollariga cho‘mgan insonlar bo‘ladi. Biroq har soha va joyda bo‘lgani kabi, ular orasida ham istisnolar uchrab turadi. Aynan shunday istisnolar sirasiga Joze Mourinyo juda mos tushadi. Boisi u faoliyatining ilk yillaridan boshlab, ko‘pchilikni o‘ziga qarata olgan va barcha ishlagan joylarida qandaydir “sarguzasht”larni boshdan o‘tkazgan. Benazirning (Mourinyo o‘ziga shunday ta’rif beradi) muxlislariga esa uning maydondagi taktika va chiziqlari, shuningdek, matbuot anjumanidagi tesha tegmagan gaplaridan tashqari, qanday hayot kechirishi, qaysi avtomobillardan foydalanishi va qancha daromad ko‘rishi ham qiziq ekani, shubhasiz. Shunday ekan, quyida Joze Mourinyoning qanday hayot kechirishi haqida hikoya qilamiz.

Mourinyo qayerda yashaydi?

Jozening “Tottenhem”ga o‘tishiga klubning Londonda joylashgani sabab bo‘lgandek go‘yo. Chunki aynan Londonda murabbiyning o‘z mulki mavjud. Joze Londondagi uyini 2012-yilda sotib olgan. O‘sha vaqtlarda esa u “Real” bosh murabbiyi edi.

Ushbu uy uchun Mourinyo 4,5 million yevro sarflagan. Uy esa “Chelsi” xo‘jayini Roman Abramovichga tegishli edi. Aytishlaricha, Abramovich Mourinyoning “Chelsi”ga qaytishi uchun uyning narxini arzonlashtirib bergan ekan.

Mourinyo qanday mashinalarda yuradi?

Mourinyo mashinalarni juda yaxshi ko‘radi, biroq ularni boshqarishni unchalik ham xushlamaydi. Shuning uchun uni ko‘pincha orqa o‘rindiqda ko‘rish mumkin.

Portugaliyalikning garajidagi ilk avtomobil Aston Martin Rapide bo‘lib, Joze uni 2010-yilda “Inter” bilan oltin het-trikka (Italiya chempionati va Kubogi hamda Chempionlar Ligasida g‘olib bo‘lgan) erishganida sotib olgan.

Bir muncha oldinroq esa Roman Abramovich Jozega qiymati 320 ming dollar bo‘lgan Ferrari 612 Scaglietti’ni sovg‘a qilgan.

Shuningdek, uning garajida Jaguar F-Type Coupe’ni ham ko‘rish mumkin. E’tiborga molik jihati, Mourinyo Jaguar brendining yuzi hisoblanadi.

Mourinyoning shaxsiy hayoti?

Joze doimiy ravishda barcha intervyularida u uchun hayotdagi asosiy narsa oila ekanligini aytib keladi. Murabbiyning rafiqasi Jozedan ikki yosh kichik Matilda Faria. Joze u bilan bolalikdan do‘st bo‘lgan, keyinchalik bu tuyg‘u muhabbatga aylangan. Shu tariqa Joze va Matilda 1989-yilda turmush qurishga qaror qiladi. Yetti yil o‘tgach, juftlik qiz farzandli bo‘ladi, chaqaloqqa Matilda ismi qo‘yiladi. 2000- yilda esa oilada o‘g‘il farzand dunyoga keladi, unga esa Joze ismi beriladi. Ko‘rinib turibdiki, er-xotin ism tanlashda unchalik ham boy fantaziyasiga ega emas.

Mourinyoning do‘stlari kim?

Mourning xulq-atvori tufayli u bilan do‘st bo‘lish unchalik oson ish emas. Shunga qaramay, uning atrofida bir qator insonlarni ko‘rish mumkin.

Bular orasida Portugaliya terma jamoasining sobiq futbolchisi Deku ham bor. Aynan Mourinyo uni Yevropa futbolining yulduziga aylantirgan. Deku hanuzgacha Mour bilan iliq munosabatlarni saqlab qolgan.

Mourinyoning do‘stlaridan yana biri Marko Materatssi. Ha, bu o‘sha barchaga mashhur-u ma’lum Materatssi janoblarining xuddi o‘zi. Marko “Inter”ni tark etganidan so‘ng do‘stisiz ancha qiynalgan ekan.

Shuningdek, benazir 17 yil yonma-yon ishlagan Ruy Faria bilan ham iliq munosabatlarga ega. U Jozega barcha klublarda yordamchilik qilgan.

Mourinyo futboldan  tashqari nimalarga qiziqadi?

Mourinyoning yoshini hisobga olib (57), aytish mumkinki, uning hayotida ulkan bir tadbirlar unchalik ham ko‘p emas. U futbol haqida o‘ylamayotgan vaqtlarda shunchaki divanda yotishni va televizor ko‘rishni yoqtiradi.

Ta’til paytida esa Joze suv sporti bilan shug‘ullanishi mumkin, ammo unchalik ko‘p vaqt olmaydi. Shuningdek, u Angliyadagi ko‘p yillik faoliyati orqali tennisga qiziqib qolgan.

Mourinyoning daromadi qancha?

Mourinyo “Tottenhem”da “Manchester Yunayted”dagiga nisbatan ancha kam maosh oladi. Joze 2019-yilning 20-noyabr sanasida Mauritsio Pochettinoning o‘rnini egallab, jamoa bilan 2023-yilgacha mo‘ljallangan shartnoma imzolagandi. Klub rahbarlari unga yiligi 13 million yevro to‘laydi, “Manchester”da esa bu ko‘rsatkich 20 million yevroga teng edi.

Biroq Mourinyo singari murabbiyning “bor-yo‘g‘i” bu bilan cheklanmasligi aniq. Klubdagi maosh Jozening asosiy daromad manbayi emas. “Benazir” EA Sports’ning yuzi hisoblanadi, shuningdek, uning Adidas, Hublot soatlari, Jaguar, BT Sport, Lipton choyi, Atlantis mehmonxonalar tarmog‘i va boshqa bir qator kompaniyalar bilan shartnomalari bor. Umuman olganda, Mourinyo bir yil ichida faqat reklama shartnomalaridan o‘rtacha 40 million yevro daromad ko‘radi. Bu raqamlarga esa oddiy odamlar uyoqda tursin, manaman degan futbolchi ham hasad qilishi aniq.