So‘nggi ikki haftada dunyoda koronavirusdan o‘limlar soni 18 foizga ortdi. “RBK”ning xabar berishicha, bu haqda JSST Yevropa mintaqaviy byurosi direktori Xans Klyuge brifingda ma’lum qildi.
“O‘tgan haftada Yevropada COVID-19’dan vafot etish bo‘yicha 32 mingta yangi holat qayd etildi. Bu Yevropada har 17 soniyada COVID-19’dan bir kishi vafot etayotganini bildiradi”, — degan byuro rahbari.
Uning ta’kidlashicha, koronavirus bilan bog‘liq vaziyat yomonlashganiga qaramay, “umumiy karantin joriy etish bu so‘nggi chora”.
Mavzuga doir: Chexiya Yevroittifoqda koronavirusdan o‘lim holatlari bo‘yicha yetakchi davlatga aylandi
Klyugening ta’kidlashicha, koronavirusdan o‘limlar sonini kamaytirishga hissa qo‘shish uchun qat’iy ko‘rsatmalarga rioya qilish, COVID-19 haqidagi noto‘g‘ri ma’lumotlar tarqalishini to‘xtatish va bunday kasallik mavjudligi inkor etilishiga qarshi kurashish zarur.
JSST ma’lumotlariga ko‘ra, so‘nggi sutkada dunyoda 542,7 ming kishi koronavirusga chalingani, bemorlarning 7,7 ming nafari vafot etgani qayd etildi. Jons Hopkins universiteti ma’lumotlariga ko‘ra, dunyoda koronavirusga chalinganlar soni 59 milliondan oshdi.
Kasallanganlar va vafot etganlar soni bo‘yicha AQSh yetakchilik qilmoqda, u yerda 12,4 milliondan ortiq kishi virusni yuqtirib olgan, 257,6 mingdan ziyodi vafot etgan. COVID-19’ga chalinish holatlari soni bo‘yicha ikkinchi va uchinchi o‘rinlarda Hindiston (9,1 milliondan ortiq) va Braziliya (6 milliondan ziyod) turibdi, o‘limlar soni bo‘yicha esa ikkinchi o‘rinda Braziliya (169,4 ming), uchinchida — Hindiston (133,7 ming).
Koronavirusga chalinish holatlari bo‘yicha to‘rtinchi o‘rinda Fransiya (2,1 million), beshinchida — Rossiya (2 milliondan ortiq) bormoqda. Vafot etganlar soni bo‘yicha to‘rtinchi va beshinchi o‘rinlarni Meksika (101,6 ming) va Buyuk Britaniya (55,3 ming) egalladi.
JSST ma’lumotlariga ko‘ra, so‘nggi bir oyda dunyo bo‘yicha aniqlangan kasallanish holatlari pandemiyaning ilk olti oyi davomida aniqlangandan ko‘ra ko‘proqdir. So‘nggi ikki hafta mobaynida tashkilot bir hafta uchun rekord darajadagi kasallanish holatlarini qayd etdi. AQShda esa bir haftada 1 milliondan ziyod koronavirusga chalinish holati aniqlandi.
Izoh (0)