Сўнгги икки ҳафтада дунёда коронавирусдан ўлимлар сони 18 фоизга ортди. «РБК»нинг хабар беришича, бу ҳақда ЖССТ Европа минтақавий бюроси директори Ханс Клюге брифингда маълум қилди.
«Ўтган ҳафтада Европада COVID-19’дан вафот этиш бўйича 32 мингта янги ҳолат қайд этилди. Бу Европада ҳар 17 сонияда COVID-19’дан бир киши вафот этаётганини билдиради», — деган бюро раҳбари.
Унинг таъкидлашича, коронавирус билан боғлиқ вазият ёмонлашганига қарамай, «умумий карантин жорий этиш бу сўнгги чора».
«Ўз-ўзини изоляция қилиш билан боғлиқ зиён сезиларли даражада: у иқтисодий оқибатлар, руҳий саломатликнинг ёмонлашуви, алкоголь ва гиёҳванд моддаларни суиистеъмоли, гендер зўравонлик ва соғлиқни сақлашнинг асосий хизматлари иши бузилиши кабиларни ўз ичига олади», — деб огоҳлантирди ЖССТ Европа бюроси раҳбари.Клюгенинг таъкидлашича, коронавирусдан ўлимлар сонини камайтиришга ҳисса қўшиш учун қатъий кўрсатмаларга риоя қилиш, COVID-19 ҳақидаги нотўғри маълумотлар тарқалишини тўхтатиш ва бундай касаллик мавжудлиги инкор этилишига қарши курашиш зарур.
ЖССТ маълумотларига кўра, сўнгги суткада дунёда 542,7 минг киши коронавирусга чалингани, беморларнинг 7,7 минг нафари вафот этгани қайд этилди. Жонс Ҳопкинс университети маълумотларига кўра, дунёда коронавирусга чалинганлар сони 59 миллиондан ошди.
Касалланганлар ва вафот этганлар сони бўйича АҚШ етакчилик қилмоқда, у ерда 12,4 миллиондан ортиқ киши вирусни юқтириб олган, 257,6 мингдан зиёди вафот этган. COVID-19’га чалиниш ҳолатлари сони бўйича иккинчи ва учинчи ўринларда Ҳиндистон (9,1 миллиондан ортиқ) ва Бразилия (6 миллиондан зиёд) турибди, ўлимлар сони бўйича эса иккинчи ўринда Бразилия (169,4 минг), учинчида — Ҳиндистон (133,7 минг).
Коронавирусга чалиниш ҳолатлари бўйича тўртинчи ўринда Франция (2,1 миллион), бешинчида — Россия (2 миллиондан ортиқ) бормоқда. Вафот этганлар сони бўйича тўртинчи ва бешинчи ўринларни Мексика (101,6 минг) ва Буюк Британия (55,3 минг) эгаллади.
ЖССТ маълумотларига кўра, сўнгги бир ойда дунё бўйича аниқланган касалланиш ҳолатлари пандемиянинг илк олти ойи давомида аниқлангандан кўра кўпроқдир. Сўнгги икки ҳафта мобайнида ташкилот бир ҳафта учун рекорд даражадаги касалланиш ҳолатларини қайд этди. АҚШда эса бир ҳафтада 1 миллиондан зиёд коронавирусга чалиниш ҳолати аниқланди.
Изоҳ (0)