Ispaniya qiroli Filipp VI 23-noyabr kunidan boshlab 10 kunlik karantin rejimiga o‘tdi, deb xabar bermoqda El Pais’ga tayanib “Kommersant”.
Ma’lum qilinishicha, qirol koronavirusga chalingan odam bilan muloqotda bo‘lgan. Hodisa 22-noyabr yakshanba kuni bo‘lib o‘tgan. Qirol aniq kim bilan uchrashgani haqida ma’lumot berilmagan.
Shuningdek, bemor odam bilan muloqotda bo‘lganidan keyin qirolning o‘zi koronavirus testini o‘tkazganmi yoki yo‘qmi aniqlanmagan. Uning ishtirokidagi barcha tadbirlar bekor qilingan.
Jons Hopkins universitetining ma’lumotlariga ko‘ra, Ispaniyada pandemiya boshlanganidan beri 1 582 616 odam koronavirus bilan kasallangan. Bemorlarning 43 131 nafari vafot etgan.
Ispaniya hukumati 25-oktabr kuni koronavirus tarqalishi sababli yuqori ogohlantirish rejimini joriy qildi. Mamlakatda soat 23:00 dan keyin komendantlik soati amal qiladi hamda olti kishidan ko‘proq odam bir joyga yig‘ilishi taqiqlanadi. Keyinroq mamlakatdagi favqulodda holat rejimi 2021-yilning may oyigacha uzaytirildi.
Izoh (0)