Islandiya hukumati masofadan turib ishlaydigan xorijliklar uchun uzoq muddatli vizalarni olish tartibini ishlab chiqdi. Mamlakatda uzoq muddat yashash huquqini qo‘lga kiritish uchun oyiga 1 million Islandiya kronasi (7360 dollar) yoki yiliga 88 ming dollar daromad ko‘rishi to‘g‘risidagi faktni taqdim etish lozim, deb xabar beradi Bloomberg.
Yangi tartib Islandiyaga qisqa muddatli safar uchun turistik viza talab etilmaydigan xorijliklarga taalluqli. Davlat portalida e’lon qilingan ro‘yxatga ko‘ra, gap Shengen vizasiga ega mamlakatlar, AQSh yoki BAA haqida ketmoqda.
Avvallari ushbu mamlakat fuqarolari mamlakat hududida 90 kungacha qolishi mumkin edi. Endilikda esa masofadan turib ishlash borasida xorij kompaniyasi bilan imzolagan shartnomasi, shuningdek, daromadi to‘g‘risidagi hujjatlarni taqdim etgan holda ular o‘z oilasi bilan Islandiyada olti oygacha yashashi mumkin.
Mamlakat parlamentining sobiq a’zosi Asta Gudrun Xelgadouttirning fikricha, ushbu choralar yordamida hukumat pandemiya oqibatida kamayib ketgan turistlar oqimini barqarorlashtirmoqchi. “O‘ylashimcha, ushbu g‘oyadan maqsad Kremniy vodiysi yoki San-Fransiskodagi katta maosh oladigan professionallarni jalb qilib, o‘z pullarini u yerda emas, bizning mamlakatda sarf qilishlariga qaratilgan”, — deydi siyosatchi.
Islandiya hukumati ushbu qarorni oktabr oxirida qabul qilgan. Moliya va iqtisodiyot vaziri Byarni Benediktsonning ta’kidlashicha, masofadan turib ishlash uchun kelganlar mamlakat iqtisodiyotining tiklanishiga yordam ko‘rsatadi.
Ma’lumot uchun, 2010-yilda Islandiyaga 459 ming turist tashrif buyurgan bo‘lsa, 2018-yilda ularning soni 2,3 millionga yetgan. 2019-yilda 2 milliondan kamroq turist tashrif buyurgan.
Izoh (0)