O‘zbekistonda gazning kunlik iste’moli 46 milliondan 70 million kubometrga yetgani ma’lum qilindi

Havo haroratining keskin pasayishi munosabati bilan eng muhim masalalardan biri aholini tabiiy va suyultirilgan gaz bilan ta’minlash hisoblanadi. So‘nggi kunlarda gazning kunlik iste’moli 46 dan 70 million kub metrga oshishi, tarmoqlar, gaz taqsimlash uskunalari hamda “Hududgazta’minot” tarkibiy bo‘linmalarining dispetcherlik xizmatlari ishidagi yukni sezilarli darajada oshirdi, deya xabar bergan “Hududgazta’minot” axborot xizmati.

Korxona xabariga ko‘ra, ushbu faoliyatni muvofiqlashtirish uchun kecha-yu kunduz ishlovchi shtab tashkil qilingan, 236 ta tezkor avariya-ta’mirlash guruhlari shay holatga keltirilib, joylarda yuzaga keluvchi avariya yoki texnik nosozliklarni bartaraf etish uchun zarur bo‘lgan transport vositalari, mutaxassislar, asbob-uskunalar, maxsus ishchi kiyimlar va tegishli butlovchi qismlar bilan ta’minlangan.

Shuningdek, Energetika vazirligi, “O‘ztransgaz” va “O‘zbekneftgaz” markaziy dispetcherlik boshqarmalari bilan aloqa o‘rnatilib, o‘z vaqtida iste’molchilarni yonilg‘i bilan uzluksiz ta’minlash bo‘yicha tegishli choralar ko‘rilmoqda.

“Hududgazta’minot” axborot xizmatining qayd etishicha kuz—qish mavsumiga tayyorgarlik ishlari 2020-yilning mart oyidan boshlanib, oktabr oyiga qadar to‘liq yakunlangan. Ushbu davr mobaynida 6949 kilometr uzunlikdagi gaz quvurlarining ichki yuzasini tozalash va sizib chiqish yo‘qligini tekshirish bo‘yicha ishlar olib borilgan, 123,5 kilometr gaz taqsimlash tarmoqlari va 623 ta gazni taqsimlash punktlari (GRP) ta’mirlanib, 80 359 tasi to‘liq taftishdan o‘tkazilgan.

Suyultirilgan gaz bilan ta’minlash infratuzilmasini takomillashtirish va jihozlash, xizmat ko‘rsatishda olis hududlar qamrovini kengaytirish, transport xarajatlari va yetkazib berishga sarflanuvchi vaqtni kamaytirish, sohada xizmat ko‘rsatish sifatini oshirish maqsadida, Farg‘ona viloyatining “So‘x”, Navoiy viloyatining “Uchquduq” va Samarqand viloyatining “Qo‘shrabot” gaz quyish shoxobchalari va punktlarining ishga tushirilishi natijasida ularning soni 46 tadan 50 taga yetkazilgan.

Suyultirilgan gazni ishlab chiqaruvchi zavodlardan tashib keltirish uchun 23 ta temiryo‘l vagonlari sotib olingan. Qo‘shimcha 36 ming dona maishiy gaz ballonlari foydalanish uchun tarqatilgan. Natijada 2020-yilning o‘tgan davri mobaynida mamlakat aholisini 451,9 ming tonnadan ortiq miqdorda suyultirilgan gaz bilan ta’minlashga imkoni yaratilgan. Korxona axborot xizmatiga ko‘ra ushbu ko‘rsatkich 2019-yilning mos davriga nisbatan 40 ming tonnaga ko‘p.

Ayozli kunlarda iste’molchilarning ehtiyojini qondirish uchun suyultirilgan gazning kunlik yetkazib berish miqdori 1400 tonnadan 1920 tonnaga oshirilgan (26 ming maishiy gaz ballonlari qo‘shimcha ravishda to‘ldirildi), deyiladi kompaniya axborotida.

“Hududgazta’minot” axborot xizmati ma’lumoti bo‘yicha, respublikaning ayrim mahalla va hududlarida gaz bosimi bilan bog‘liq uzilishlar kuzatilmoqda va bu tabiiy gaz iste’molchilarining umumiy soniga nisbatan 4 foizdan ko‘p emas.

Kompaniya markaziy dispetcherlik boshqarmasi ma’lumotlariga ko‘ra, gaz taqsimlash tarmoqlari obyektlari va asosiy uskunalari holati, suyultirilgan gazni tashish va yetkazib berish, shuningdek, 3,7 milliondan ziyod tabiiy va 3,6 millionga yaqin suyultirilgan gaz iste’molchilarining kundalik iste’moli hajmini tizimli kuzatish hamda nazorat qilish yo‘lga qo‘yilgan.

Shuningdek, kompaniya rasmiy xabarida 2020-yilning 20-noyabr soat 20:00 ga qadar bosim bilan muammolarga duch kelayotgan mahalla va tumanlarning ro‘yxati keltirilgan. Undagi ma’lumotlarda Farg‘ona, Namangan, Andijon, Samarqand, Navoiy va Jizzax viloyatlarida aholida gaz ta’minoti bilan bog‘liq muammolar kuzatilgan.

Energetika vazirligi va “O‘ztransgaz” dispetcherlik boshqarmalari bilan birgalikda gaz quvurlarida bosimni oshirish bo‘yicha tegishli choralar ko‘rmoqda, deyiladi xabarda.

“Hududgazta’minot” xabarida mavjud resurslardan oqilona foydalanish va yo‘qotishlarni kamaytirish maqsadida, har bir hududda tegishli targ‘ibot-tushuntirish ishlari olib borilmoqda, yakka tartibdagi xo‘jalik yurituvchi subyektlar tomonidan gaz o‘g‘irliklarini aniqlash bo‘yicha reydlar o‘tkazilayotganini qayd etilgan.

“O‘tgan oy davomida turli xildagi mahsulot ishlab chiqaruvchi vijdonsiz tadbirkorlar tomonidan gaz tarmoqlariga noqonuniy ulanish bo‘yicha 185 ta holat aniqlanib, bu esa o‘z navbatida ayrim mahalla, ko‘cha, tuman va shaharlarda aholini bir maromda tabiiy gaz bilan ta’minlashga o‘z salbiy ta’sirini ko‘rsatmasdan qolmadi. (10 kunlik ma’lumot)”, – deyilgan xabarda.

Kompaniya xabarida ASKUG loyihasi doirasida butun mamlakat bo‘ylab 515 mingdan ziyod “aqlli” hisoblagichlar o‘rnatildi va bu ham xarajatlarni bir me’yorga keltirish hamda tabiiy gazdan maqsadsiz foydalanishlarni aniqlash imkonini berayotgani, xususan, qator tumanlarda yakka tartibdagi uy xo‘jaliklari tomonidan parrandachilik xonalarni va issiqxonalarni isitish, yashirin ohak pechlarini yoqish yoki o‘sha manzillardagi xonadonning gazlashtirish loyihasiga kiritilmagan qo‘shimcha gaz uskunalaridan foydalanilishi oqibatida tabiiy gazni me’yordan ortiq sarflash holatlari aniqlangani ma’lum qilingan.

Misol tariqasida, “Terranova” dasturi orqali ba’zi abonentlarning bir oyda 7 ming kub metrgacha gaz iste’mol qilishi aniqlangani. Vaholanki, ushbu uylarning gazlashtirish texnik loyihalariga ko‘ra, bir oyda o‘rtacha iste’mol 1000 kub metrdan oshmasligi kerakligi ko‘rsatib o‘tilgan.

Ma’lumotlarga ko‘ra Toshkent, Qibray, Zangiota, Piskent va Parkent tumanlarida shunga o‘xshash qator holatlar aniqlangan.