Toshkent shahri Chilonzor tumanida Malibu avtomobili salonidan giyohvand moddalari topiladi, deya xabar bermoqda Tergov departamenti.
Ma’lum qilinishicha, 2020-yilning 12-noyabr kuni soat taxminan 20:30 da Chilonzor tumani bo‘yicha IIO FMB xodimlari Chilonzor tumani 19-mavzeda xizmat olib borayotgan vaqtida “Istanbul” do‘koni oldida fuqaro 30 yoshli Oybek D. boshqaruvidagi Malibu rusumli avtomashinada o‘zini shubhali tutganligi sababli uning yoni va boshqaruvidagi avtomashinasi xolislar ishtirokida ko‘zdan kechirilgan.
Tekshiruv davomida avtomashina old yo‘lovchi o‘rindig‘ida polietilen paket ichida ko‘k rangli kukunsimon modda va 5 dona har xil rangli plastmassa naychalar borligi aniqlanib, tegishli tartibda hujjatlashtirib olingan.
Sud-kimyoviy ekspertiza xulosasida, fuqaro Oybek D.dan olingan modda tarkibida giyohvand vosita pirrolidinovalerofenon mavjud bo‘lib, uning og‘irligi 0,25 grammni tashkil etishi, 5 dona plastmassa naychalarda ham pirrolidinovalerofenon izlari borligi aniqlangan.
Holat yuzasidan Chilonzor tumani bo‘yicha IIO FMB 1-sonli IIB Tergov bo‘limi tomonidan Oybek D.ga nisbatan Jinoyat kodeksining 276-moddasi 2-qismi “a” bandi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash, egallash, saqlash va boshqa harakatlar) bilan jinoyat ishi qo‘zg‘atilgan.
Jinoyat ishi bo‘yicha Oybek D. gumon qilinuvchi tariqasida ishda ishtirok etishga jalb qilinib, himoyachi ishtirokida so‘roq qilingan. Hozirda tergov harakatlari olib borilmoqda.
Avvalroq Buxoroda salkam 1,5 kilolik giyohvand moddani sotish maqsadida saqlab kelayotgan jinoiy guruh qo‘lga olingani, Yakkabog‘da 72 yoshli otaxonning uyidan qariyb 2 kg giyohvand vosita aniqlangani hamda O‘zbekistonga kirib kelgan poyezddan salkam 173 kilogramm narkotik topilgani haqida xabar berilgandi.