Ўзбекистонда газнинг кунлик истеъмоли 46 миллиондан 70 миллион кубометрга етгани маълум қилинди

Ҳаво ҳароратининг кескин пасайиши муносабати билан энг муҳим масалалардан бири аҳолини табиий ва суюлтирилган газ билан таъминлаш ҳисобланади. Сўнгги кунларда газнинг кунлик истеъмоли 46 дан 70 миллион куб метрга ошиши, тармоқлар, газ тақсимлаш ускуналари ҳамда «Ҳудудгазтаъминот» таркибий бўлинмаларининг диспетчерлик хизматлари ишидаги юкни сезиларли даражада оширди, дея хабар берган «Ҳудудгазтаъминот» ахборот хизмати.

Корхона хабарига кўра, ушбу фаолиятни мувофиқлаштириш учун кеча-ю кундуз ишловчи штаб ташкил қилинган, 236 та тезкор авария-таъмирлаш гуруҳлари шай ҳолатга келтирилиб, жойларда юзага келувчи авария ёки техник носозликларни бартараф этиш учун зарур бўлган транспорт воситалари, мутахассислар, асбоб-ускуналар, махсус ишчи кийимлар ва тегишли бутловчи қисмлар билан таъминланган.

Шунингдек, Энергетика вазирлиги, «Ўзтрансгаз» ва «Ўзбекнефтгаз» марказий диспетчерлик бошқармалари билан алоқа ўрнатилиб, ўз вақтида истеъмолчиларни ёнилғи билан узлуксиз таъминлаш бўйича тегишли чоралар кўрилмоқда.

«Ҳудудгазтаъминот» ахборот хизматининг қайд этишича куз—қиш мавсумига тайёргарлик ишлари 2020 йилнинг март ойидан бошланиб, октябрь ойига қадар тўлиқ якунланган. Ушбу давр мобайнида 6949 километр узунликдаги газ қувурларининг ички юзасини тозалаш ва сизиб чиқиш йўқлигини текшириш бўйича ишлар олиб борилган, 123,5 километр газ тақсимлаш тармоқлари ва 623 та газни тақсимлаш пунктлари (ГРП) таъмирланиб, 80 359 таси тўлиқ тафтишдан ўтказилган.

Суюлтирилган газ билан таъминлаш инфратузилмасини такомиллаштириш ва жиҳозлаш, хизмат кўрсатишда олис ҳудудлар қамровини кенгайтириш, транспорт харажатлари ва етказиб беришга сарфланувчи вақтни камайтириш, соҳада хизмат кўрсатиш сифатини ошириш мақсадида, Фарғона вилоятининг «Сўх», Навоий вилоятининг «Учқудуқ» ва Самарқанд вилоятининг «Қўшработ» газ қуйиш шохобчалари ва пунктларининг ишга туширилиши натижасида уларнинг сони 46 тадан 50 тага етказилган.

Суюлтирилган газни ишлаб чиқарувчи заводлардан ташиб келтириш учун 23 та темир йўл вагонлари сотиб олинган. Қўшимча 36 минг дона маиший газ баллонлари фойдаланиш учун тарқатилган. Натижада 2020 йилнинг ўтган даври мобайнида мамлакат аҳолисини 451,9 минг тоннадан ортиқ миқдорда суюлтирилган газ билан таъминлашга имкони яратилган. Корхона ахборот хизматига кўра ушбу кўрсаткич 2019 йилнинг мос даврига нисбатан 40 минг тоннага кўп.

Аёзли кунларда истеъмолчиларнинг эҳтиёжини қондириш учун суюлтирилган газнинг кунлик етказиб бериш миқдори 1400 тоннадан 1920 тоннага оширилган (26 минг маиший газ баллонлари қўшимча равишда тўлдирилди), дейилади компания ахборотида.

«Ҳудудгазтаъминот» ахборот хизмати маълумоти бўйича, республиканинг айрим маҳалла ва ҳудудларида газ босими билан боғлиқ узилишлар кузатилмоқда ва бу табиий газ истеъмолчиларининг умумий сонига нисбатан 4 фоиздан кўп эмас.

Компания марказий диспетчерлик бошқармаси маълумотларига кўра, газ тақсимлаш тармоқлари объектлари ва асосий ускуналари ҳолати, суюлтирилган газни ташиш ва етказиб бериш, шунингдек, 3,7 миллиондан зиёд табиий ва 3,6 миллионга яқин суюлтирилган газ истеъмолчиларининг кундалик истеъмоли ҳажмини тизимли кузатиш ҳамда назорат қилиш йўлга қўйилган.

Шунингдек, компания расмий хабарида 2020 йилнинг 20 ноябрь соат 20:00 га қадар босим билан муаммоларга дуч келаётган маҳалла ва туманларнинг рўйхати келтирилган. Ундаги маълумотларда Фарғона, Наманган, Андижон, Самарқанд, Навоий ва Жиззах вилоятларида аҳолида газ таъминоти билан боғлиқ муаммолар кузатилган.

Энергетика вазирлиги ва «Ўзтрансгаз» диспетчерлик бошқармалари билан биргаликда газ қувурларида босимни ошириш бўйича тегишли чоралар кўрмоқда, дейилади хабарда.

«Ҳудудгазтаъминот» хабарида мавжуд ресурслардан оқилона фойдаланиш ва йўқотишларни камайтириш мақсадида, ҳар бир ҳудудда тегишли тарғибот-тушунтириш ишлари олиб борилмоқда, якка тартибдаги хўжалик юритувчи субъектлар томонидан газ ўғирликларини аниқлаш бўйича рейдлар ўтказилаётганини қайд этилган.

«Ўтган ой давомида турли хилдаги маҳсулот ишлаб чиқарувчи виждонсиз тадбиркорлар томонидан газ тармоқларига ноқонуний уланиш бўйича 185 та ҳолат аниқланиб, бу эса ўз навбатида айрим маҳалла, кўча, туман ва шаҳарларда аҳолини бир маромда табиий газ билан таъминлашга ўз салбий таъсирини кўрсатмасдан қолмади. (10 кунлик маълумот)», – дейилган хабарда.

Компания хабарида АСКУГ лойиҳаси доирасида бутун мамлакат бўйлаб 515 мингдан зиёд «ақлли» ҳисоблагичлар ўрнатилди ва бу ҳам харажатларни бир меъёрга келтириш ҳамда табиий газдан мақсадсиз фойдаланишларни аниқлаш имконини бераётгани, хусусан, қатор туманларда якка тартибдаги уй хўжаликлари томонидан паррандачилик хоналарни ва иссиқхоналарни иситиш, яширин оҳак печларини ёқиш ёки ўша манзиллардаги хонадоннинг газлаштириш лойиҳасига киритилмаган қўшимча газ ускуналаридан фойдаланилиши оқибатида табиий газни меъёрдан ортиқ сарфлаш ҳолатлари аниқлангани маълум қилинган.

Мисол тариқасида, «Терранова» дастури орқали баъзи абонентларнинг бир ойда 7 минг куб метргача газ истеъмол қилиши аниқлангани. Ваҳоланки, ушбу уйларнинг газлаштириш техник лойиҳаларига кўра, бир ойда ўртача истеъмол 1000 куб метрдан ошмаслиги кераклиги кўрсатиб ўтилган.

Маълумотларга кўра Тошкент, Қибрай, Зангиота, Пискент ва Паркент туманларида шунга ўхшаш қатор ҳолатлар аниқланган.