Di Stefano, Zidan, Ramos va Ronaldu. “Real” tarixidagi eng yaxshi futbolchilar haqida

Madrid dunyoning eng muvaffaqiyatli, ommabop, sovrindor va boy klublardan biri hisoblanadi. Klub tashkil topganidan beri unda ko‘plab yuqori darajadagi futbolchilar to‘p surib kelgan, ularning aksariyati esa jamoaning ramzi va afsonasiga aylangan. Demak, quyida “qirollik klubi” tarixidagi eng yaxshi futbolchilari haqida fikr yuritiladi.

Alfredo di Stefano

“Real” tarixidagi eng buyuk futbolchilardan biri bu, shubhasiz, di Stefanodir. Alfredo o‘tgan asrning 50-yillarida madridliklarning Yevropa maydonlarida to‘liq ustunlik qilishini ta’minlardi. Argentinalik yetakchisi tufayli jamoa Chempionlar Kubogining dastlabki beshta unvonini qo‘lga kiritgan. Alfredo esa har beshala finalda ham gol urishga muvaffaq bo‘lgan. Umumiy hisobda di Stefano “qaymoqranglilar” safida 396 o‘yinda 308 bor raqiblar darvozasini ishg‘ol qilgan. Di Stefano – ko‘p qirrali futbolchi bo‘lib, himoyachilarga yordam berishdan tortib to “yirtqich” hujumchi vazifasigacha bajarardi.

Krishtianu Ronaldu

Agar di Stefano “Real”ning XX asrdagi eng yaxshi o‘yinchisi bo‘lsa, Ronaldu XXI asrda ana shunday nomga loyiq ko‘rilgan. 9 mavsum davomida portugaliyalik muntazam ravishda gollar urib, “qaymoqranglilar” safida rasmiy turnirlarda naq 450 ta golni o‘z nomiga yozdirib qo‘ydi. Bu esa unga jamoaning eng yaxshi to‘purari degan maqomni taqdim etdi. Madridliklarning 4 marta Chempionlar Ligasida g‘olib chiqishida ham, shubhasiz, Ronaldu muhim rol o‘ynagan. Ochig‘ini aytganda, agar Ronaldu bo‘lmaganida “Real”ning ushbu o‘n yillikda “El-Klasiko” va umuman, Messisi bo‘lgan “Barselona”ga qanday raqobat ko‘rsatishini tasavvur qilish mushkul.

Raul Gonsales

Gonsales “Santyago Bernabeu”da uzoq va muvaffaqiyatli yillarni o‘tkazdi. O‘tkazilgan o‘yinlar soni bo‘yicha (741) “Real Madrid”ning rekordchisi yaqin vaqtgacha klub (323 ta gol) va Chempionlar Ligasi tarixidagi (71 ta gol) eng yaxshi to‘purar bo‘lib turgandi. Raul jamoani o‘z ortidan ergashtira olardi, u gapirayotganda esa xohlasa, xohlamasa uni hamma eshitishga majbur edi. Uning maydondagi eng ustun jihati – kerakli vaqtda kerakli joyda bo‘la olishi edi. Uning to‘pni ohistalik bilan darvozabonlar ustidan oshirib tashlashiga esa ortiqcha ta’rif bermagan ma’qul.

Raul Madrid klubining ramzi bo‘lib, u jamoa bilan besh yil davomida uch marta Chempionlar Ligasida g‘alaba qozongan. Shuningdek, olti bor La Liga chempionligini ham qo‘lga kiritgan. “Real” muxlislari Raulni juda yaxshi ko‘rardi, hatto unga “Madrid qiroli” deb laqabi berilgandi.

Fransisko “Pako” Xento

Xento futbol tarixida olti marta Chempionlar Kubogi/Ligasida g‘alaba qozongan yagona o‘yinchi hisoblanadi.  50–60-yillarda chap qanot vingeri o‘zining ajoyib tezligi va driblingi bilan mashhurlikka erishgandi. Uning yagona kamchiligi di Stefano va Ferens Pushkash singari yulduzlar bilan bir vaqtda o‘ynagani bo‘lgan.

Serxio Ramos

“Real” safida o‘zining 16-mavsumini o‘tkazayotgan Madrid qo‘rg‘oni 34 yoshda bo‘lishiga qaramay, hamon yuqori darajada o‘ynamoqda. U to‘rt karra Chempionlar Ligasi g‘olibi sanaladi, “Real” safida umumiy hisobda 696 uchrashuv o‘tkazib, 100 ta gol urgan va 22 ta sovrin qo‘lga kiritgan. Bu esa himoyachi uchun kamtarona bo‘lmagan raqamlardir. Shunday ekan, u to‘g‘risida ortiqcha yozishga hojat yo‘q. Faqatgina uning o‘yinini kuzatishning o‘zi yetarli.

Iker Kasilyas

10 yildan ortiq vaqt davomida Kasilyas “Real”ning 1-raqamli darvozaboni bo‘ldi. U futbol tarixidagi eng yaxshi darvozabonlardan biri hisoblanadi. Uning ijrosidagi ajoyib seyvlar ko‘pincha madridliklarni muqarrar gollardan saqlab qolardi. Barcha turnirlarda Iker madridliklar safida 725 uchrashuv o‘tkazgan. “Qaymoqranglilar” tarixidagi eng yaxshi darvozabon 21 yoshga to‘lmasidan avval ikki marta jamoaning Chempionlar Ligasidagi g‘alabasini ta’minlagandi. Shuningdek, u “Real”ning Desimani (Chempionlar Ligas/Kubogidagi 10-g‘alaba) qo‘lga kiritishida ham muhim ahamiyat kasb etgandi. Iker “Real” bilan umumiy hisobda 18 ta sovrinni qo‘lga kiritgan.

Zinedin Zidan

“Galaktikos” davri madridlik muxlislarga Figu, Zidan, Ronaldu, Bekhem kabi dunyo yulduzlarini berdi. Ammo Florentino Peresning o‘sha xaridlaridan faqat Zidan shunchalik ajoyib o‘ynadiki, uning ushbu ro‘yxatdan joy olgani ham bejizga emas. O‘sha paytda Zizu “qaymoqranglilar”ning rekord xaridiga aylangandi. Madridliklar yarim himoyachi uchun “Yuventus”ga 75 million yevro bergandi. Zinedin esa jamoaga juda tez moslashdi va eng yaxshi futbolchilardan biriga aylandi. “Qirollik klubi”da o‘tgan besh mavsumda yarim himoyachi 49 ta gol urdi. Zidan “Real”da o‘yinchi sifatida kam vaqt o‘tkazgan bo‘lsa-da, b uning klub tarixidagi eng yaxshi futbolchilar qatoridan joy olishiga to‘sqinlik qilmadi.

Roberto Karlos

Karlos “Fenerbahche”ga o‘tishidan oldin 11 yil “Santyago Bernabeu”da to‘p tepdi. Braziliyalik futbolchining jarima zarbalari asr boshida Madridning ramzlaridan yana biriga aylangandi. Roberto Karlos chap qanotda katta hajmli ishni amalga oshirardi. U hozirgi kunga qadar ham futbol tarixidagi eng yaxshi chap qanot himoyachilaridan biri hisoblanadi. Braziliyalik himoyada ideal o‘yin ko‘rsatar, yashin tezligida jamoaning hujumlarida qatnashardi. Shuningdek, Roberto Karlos o‘zining kuchli va aniq zarbasi bilan ancha mashhur edi. U 2010-yilgacha (Lukas Podolski uning rekordini yangiladi) eng kuchli zarba (198 km/soat) muallifi sifatida e’tirof etilardi.

Luka Modrich

Modrich “Real”ga 26 yoshida shakllangan futbolchi sifatida kelgandi, biroq dastlab xorvatni hatto Ispaniyada yilning eng yomon transferi deb atashdi. Ammo Luka o‘ziga bo‘lgan ishonchi va mehnatsevarligi bilan taqdir g‘ildiragini shu qadar aylantira oldiki, hozirda uning ushbu ro‘yxatdan joy olishiga hech kim e’tiroz bildir(ol)maydi. Modrich “qaymoqranglilar” bilan 17 ta sovrinni qo‘lga kiritdi. Bular qatorida to‘rtta Chempionlar Ligasi bosh sovrini ham bor.

Manolo Sanchis “qirollik klubi”da 200 ta o‘yin o‘tkazgan eng yosh futbolchi hisoblanadi. U jamoa tarkibida (1984–2000-yillar) 17 mavsum o‘tkazib, ularning faqat ikkitasidagina 30 tadan kam o‘yin o‘tkazgan. Manuel “Real”da 710 ta o‘yin o‘tkazgan, bu ko‘rsatkich bo‘yicha faqat Raul (741) va Kasilyas (725) undan oldinda. Sanchis butun faoliyatini Madridda o‘tkazgan uch (Santyago Bernabeu, Chendo va Manolo) futbolchining biridir.