Мадрид дунёнинг энг муваффақиятли, оммабоп, совриндор ва бой клублардан бири ҳисобланади. Клуб ташкил топганидан бери унда кўплаб юқори даражадаги футболчилар тўп суриб келган, уларнинг аксарияти эса жамоанинг рамзи ва афсонасига айланган. Демак, қуйида «қироллик клуби» тарихидаги энг яхши футболчилари ҳақида фикр юритилади.

Альфредо ди Стефано

«Реал» тарихидаги энг буюк футболчилардан бири бу, шубҳасиз, ди Стефанодир. Альфредо ўтган асрнинг 50 йилларида мадридликларнинг Европа майдонларида тўлиқ устунлик қилишини таъминларди. Аргентиналик етакчиси туфайли жамоа Чемпионлар Кубогининг дастлабки бешта унвонини қўлга киритган. Альфредо эса ҳар бешала финалда ҳам гол уришга муваффақ бўлган. Умумий ҳисобда ди Стефано «қаймоқранглилар» сафида 396 ўйинда 308 бор рақиблар дарвозасини ишғол қилган. Ди Стефано – кўп қиррали футболчи бўлиб, ҳимоячиларга ёрдам беришдан тортиб то «йиртқич» ҳужумчи вазифасигача бажарарди.

Криштиану Роналду

Агар ди Стефано «Реал»нинг ХХ асрдаги энг яхши ўйинчиси бўлса, Роналду XXI асрда ана шундай номга лойиқ кўрилган. 9 мавсум давомида португалиялик мунтазам равишда голлар уриб, «қаймоқранглилар» сафида расмий турнирларда нақ 450 та голни ўз номига ёздириб қўйди. Бу эса унга жамоанинг энг яхши тўпурари деган мақомни тақдим этди. Мадридликларнинг 4 марта Чемпионлар Лигасида ғолиб чиқишида ҳам, шубҳасиз, Роналду муҳим рол ўйнаган. Очиғини айтганда, агар Роналду бўлмаганида «Реал»нинг ушбу ўн йилликда «Эль-Класико» ва умуман, Мессиси бўлган «Барселона»га қандай рақобат кўрсатишини тасаввур қилиш мушкул.

Рауль Гонсалес

Гонсалес «Сантьяго Бернабеу»да узоқ ва муваффақиятли йилларни ўтказди. Ўтказилган ўйинлар сони бўйича (741) «Реал Мадрид»нинг рекордчиси яқин вақтгача клуб (323 та гол) ва Чемпионлар Лигаси тарихидаги (71 та гол) энг яхши тўпурар бўлиб турганди. Рауль жамоани ўз ортидан эргаштира оларди, у гапираётганда эса хоҳласа, хоҳламаса уни ҳамма эшитишга мажбур эди. Унинг майдондаги энг устун жиҳати – керакли вақтда керакли жойда бўла олиши эди. Унинг тўпни оҳисталик билан дарвозабонлар устидан ошириб ташлашига эса ортиқча таъриф бермаган маъқул.

Рауль Мадрид клубининг рамзи бўлиб, у жамоа билан беш йил давомида уч марта Чемпионлар Лигасида ғалаба қозонган. Шунингдек, олти бор Ла Лига чемпионлигини ҳам қўлга киритган. «Реал» мухлислари Раулни жуда яхши кўрарди, ҳатто унга «Мадрид қироли» деб лақаби берилганди.

Франциско «Пако» Хенто

Хенто футбол тарихида олти марта Чемпионлар Кубоги/Лигасида ғалаба қозонган ягона ўйинчи ҳисобланади.  50–60 йилларда чап қанот вингери ўзининг ажойиб тезлиги ва дриблинги билан машҳурликка эришганди. Унинг ягона камчилиги ди Стефано ва Ференц Пушкаш сингари юлдузлар билан бир вақтда ўйнагани бўлган.

Серхио Рамос

«Реал» сафида ўзининг 16-мавсумини ўтказаётган Мадрид қўрғони 34 ёшда бўлишига қарамай, ҳамон юқори даражада ўйнамоқда. У тўрт карра Чемпионлар Лигаси ғолиби саналади, «Реал» сафида умумий ҳисобда 696 учрашув ўтказиб, 100 та гол урган ва 22 та соврин қўлга киритган. Бу эса ҳимоячи учун камтарона бўлмаган рақамлардир. Шундай экан, у тўғрисида ортиқча ёзишга ҳожат йўқ. Фақатгина унинг ўйинини кузатишнинг ўзи етарли.

Икер Касильяс

10 йилдан ортиқ вақт давомида Касильяс «Реал»нинг 1-рақамли дарвозабони бўлди. У футбол тарихидаги энг яхши дарвозабонлардан бири ҳисобланади. Унинг ижросидаги ажойиб сейвлар кўпинча мадридликларни муқаррар голлардан сақлаб қоларди. Барча турнирларда Икер мадридликлар сафида 725 учрашув ўтказган. «Қаймоқранглилар» тарихидаги энг яхши дарвозабон 21 ёшга тўлмасидан аввал икки марта жамоанинг Чемпионлар Лигасидаги ғалабасини таъминлаганди. Шунингдек, у «Реал»нинг Десимани (Чемпионлар Лигас/Кубогидаги 10-ғалаба) қўлга киритишида ҳам муҳим аҳамият касб этганди. Икер «Реал» билан умумий ҳисобда 18 та совринни қўлга киритган.

Зинедин Зидан

«Галактикос» даври мадридлик мухлисларга Фигу, Зидан, Роналду, Бекҳэм каби дунё юлдузларини берди. Аммо Флорентино Переснинг ўша харидларидан фақат Зидан шунчалик ажойиб ўйнадики, унинг ушбу рўйхатдан жой олгани ҳам бежизга эмас. Ўша пайтда Зизу «қаймоқранглилар»нинг рекорд харидига айланганди. Мадридликлар ярим ҳимоячи учун «Ювентус»га 75 миллион евро берганди. Зинедин эса жамоага жуда тез мослашди ва энг яхши футболчилардан бирига айланди. «Қироллик клуби»да ўтган беш мавсумда ярим ҳимоячи 49 та гол урди. Зидан «Реал»да ўйинчи сифатида кам вақт ўтказган бўлса-да, б унинг клуб тарихидаги энг яхши футболчилар қаторидан жой олишига тўсқинлик қилмади.

Роберто Карлос

Карлос «Фенербаҳче»га ўтишидан олдин 11 йил «Сантьяго Бернабеу»да тўп тепди. Бразилиялик футболчининг жарима зарбалари аср бошида Мадриднинг рамзларидан яна бирига айланганди. Роберто Карлос чап қанотда катта ҳажмли ишни амалга оширарди. У ҳозирги кунга қадар ҳам футбол тарихидаги энг яхши чап қанот ҳимоячиларидан бири ҳисобланади. Бразилиялик ҳимояда идеал ўйин кўрсатар, яшин тезлигида жамоанинг ҳужумларида қатнашарди. Шунингдек, Роберто Карлос ўзининг кучли ва аниқ зарбаси билан анча машҳур эди. У 2010 йилгача (Лукас Подольски унинг рекордини янгилади) энг кучли зарба (198 км/соат) муаллифи сифатида эътироф этиларди.

Лука Модрич

Модрич «Реал»га 26 ёшида шаклланган футболчи сифатида келганди, бироқ дастлаб хорватни ҳатто Испанияда йилнинг энг ёмон трансфери деб аташди. Аммо Лука ўзига бўлган ишончи ва меҳнатсеварлиги билан тақдир ғилдирагини шу қадар айлантира олдики, ҳозирда унинг ушбу рўйхатдан жой олишига ҳеч ким эътироз билдир(ол)майди. Модрич «қаймоқранглилар» билан 17 та совринни қўлга киритди. Булар қаторида тўртта Чемпионлар Лигаси бош соврини ҳам бор.

Маноло Санчис «қироллик клуби»да 200 та ўйин ўтказган энг ёш футболчи ҳисобланади. У жамоа таркибида (1984–2000 йиллар) 17 мавсум ўтказиб, уларнинг фақат иккитасидагина 30 тадан кам ўйин ўтказган. Мануэль «Реал»да 710 та ўйин ўтказган, бу кўрсаткич бўйича фақат Рауль (741) ва Касильяс (725) ундан олдинда. Санчис бутун фаолиятини Мадридда ўтказган уч (Сантьяго Бернабеу, Чендо ва Маноло) футболчининг биридир.