Londonning “Arsenal” klubi jamoa yarim himoyachisi Mezut O‘zilni Yevropa Ligasi va Angliya Premyer Ligasi o‘yinlari qaydnomasiga kiritmadi. Ushbu holatda O‘zil kamida fevral oyigacha rasmiy o‘yinlarda qatnasha olmaydi. Bu yerda yana bir e’tiborga molik jihat shundaki, Mesut klubning eng ko‘p maosh (haftasiga 350 ming yevro) oluvchi futbolchisi hisoblanadi. Ya’ni, “Arsenal” faqat mashg‘ulot o‘tkazayotgani uchungina O‘zilga haftasiga 350 ming funt to‘laydi. Xo‘sh, asli turk millatiga mansub bo‘lgan germaniyalik futbolchi ushbu o‘ynamay topilayotgan mablag‘larni nimalarga sarflaydi? Quyida shu haqida batafsil hikoya qilamiz.
O‘zil qayerda yashaydi?
Mesut Londonning shimoliy qismida joylashgan 10 million funtlik hashamatli uyda hayot kechiradi. Uy juda keng, unda naq 6 ta yotoqxona mavjudligi ham bunga isbot bo‘la oladi.
Aytishlaricha, Mesut o‘zining turkiy ildizlarini unutmagan va butun uyning ichki qismini milliy elementlar bilan bezagan. Shuningdek, uyda katta kinoteatrni ham uchratish mumkin.
O‘zil qanday mashinalarda yuradi?
O‘zilning g‘ildirakli aravalari haqida gap ketganda, Mesut Mercedes kompaniyasi bilan shaxsiy shartnomaga ega. Shu tufayli u faqat ushbu kompaniya mashinalaridan foydalanishi mumkin.
Xususan, uning avtoparkida Mercedes SLS AMG (165 ming funt), Mercedes S65 AMG (183 ming funt) va bir qancha boshqa Mercedes’larni ko‘rish mumkin. Ta’kidlash joiz, O‘zil “Real” futbolchisi bo‘lgan mahal imzolangan shartnomaga ko‘ra Audi Q7 va RS5’ni sovg‘a sifatida qabul qilib olgan.
O‘zilning oilasi
2017-yilda Mesut Amine Gulshe ismli qiz bilan yaqin munosabatlarga kirishadi va 2019-yilda juftlik to‘y marosimini o‘tkazadi. Amine 2014-yilda Turkiyaning eng go‘zal qizi sovriniga sazovor bo‘lgan. Amine model sifatida faoliyat yuritadi. 2020-yilning mart oyida esa O‘zil ilk marta ota bo‘ldi. Juftlik tug‘ilgan qizaloqni Eda deb atashga qaror qildi.
O‘zil futboldan tashqari yana nimalarga qiziqadi?
Avtomobilllar ishtiyoqmandi bo‘lgan O‘zil bo‘sh vaqtlarida aynan mashina haydashni yoqtiradi. Shuningdek, u avtotreklarga ham chiqib turishni kanda qilmaydi. Mesutning yana bir sevimli mashg‘ulotlaridan biri, bu shaxmat. Ana endi uning nima sababdan maydonda bu qadar aql bilan harakat qilishi ayonlashmoqda. Bundan tashqari, futbolchi muntazam ravishda xayriya ishlari bilan shug‘ullanadi, betob bolalarga yordam ko‘rsatadi va ularni futbol o‘yinlariga olib kelib boradi.
O‘zilning daromadi qancha?
O‘zil “Real”ning eng yaxshilaridan biri edi (yiliga 5 million yevro olardi), ammo u bunga qanoat qilmay “Arsenal”ga o‘tib ketdi. London klubida esa pleymeyker yuqorida aytib o‘tilganidek haftasiga 350 ming funt oladi. Shuningdek, u yaqindagina klubga bo‘lgan sadoqati uchun ham 8 million funt bilan mukofotlandi. Shuningdek, Mesut reklamalar orqali ham yaxshigina daromad ko‘radi. Bunga uning Adidas va Mercedes kompaniyalari bilan tuzgan shartnomasi yaqqol misol bo‘la oladi.
Mavzuga doir:
- Chempionlikdan quvg‘inlikkacha. Mesut O‘zilning “Arsenal”ga kerak bo‘lmay qolgani haqida
- Stol tennisi tufayli futboldan voz kechishiga bir baxya qolgani, o‘z otasi bilan sudlashuv, irqchilik sabab Germaniya termasidan ketgani haqida Mesut O‘zil intervyusi
- O‘zil, Obameyang , Sanches va boshqalar. “Arsenal” tarixidagi eng qimmat transferlar haqida
Izoh (0)