“Internetda tanqid bo‘lyapti, e’tirozlar bildirilyapti, lekin javob yo‘q, munosabat yo‘q”. Senator ayrim davlat tashkilotlarining OAV bilan ishlamasligini tanqid qildi

Mansabdor shaxslar tomonidan OAV uchun maxsus ochiq matbuot anjumanlari, brifinglar o‘tkazilmagan. Ularning jurnalist va blogerlar bilan munosabatlari turli yig‘ilishlar, sayyor majlislardagi savol-javoblar bilan cheklanib qolmoqda.

Bu haqda senator Mahmud Parpiyev Oliy Majlis Senatining to‘qqizinchi yalpi majlisida “Davlat hokimiyati va boshqaruvi organlari faoliyatining ochiqligi to‘g‘risida”gi qonunning ijro etilishi masalasidagi nutqida aytib o‘tdi.

Senat ishchi guruhi tomonidan Andijon, Jizzax, Namangan, Samarqand, Farg‘ona viloyati, tuman, shahar axborot xizmatlari, Iqtisodiy taraqqiyot va kambag‘allikni qisqartirish, Ichki ishlar, Bandlik va mehnat munosabatlari, Sog‘liqni saqlash, Axborot texnologiyalari va kommunikatsiyalarini rivojlantirish, Transport vazirliklari, Davlat soliq qo‘mitasi hamda Markaziy bank faoliyatining ochiqlikni ta’minlash siyosati o‘rganilgan. O‘rganish davomida tizimli xato va kamchiliklar mavjudligi aniqlangani aytildi.

Xususan:

• Hokimiyat va boshqaruv organlari tomonidan aksariyat hollarda tadbirlar, majlislar, kengashlar, uchrashuvlar, brifinglar, matbuot anjumanlari va boshqalar to‘g‘risida OAVni xabardor qilish, ularni tashkil etish va o‘tkazish tartibi o‘rnatilmagan.
• Tahlil etilgan viloyat va tumanlarda aholi murojaatlari sahifasi yuritilmagan, natijada murojaatlar bilan ishlash nazardan chetda qolgan.
• Hokimiyat organlari axborot xizmatlari tuman yoki shahar aholisini qiynab kelayotgan masalalarni joyiga chiqqan holda o‘rganmaydi, tahlil etmaydi va o‘z vaqtida yoritmaydi.
• Ayrim vazirlik, idoralar, hokimliklar ommaviy axborot vositalari orqali murojaatlarga o‘z vaqtida munosabat bildirmay kelmoqda.

Internet tarmoqlarida tanqid bo‘lyapti, e’tirozlar bildirilyapti, lekin bunga javob yo‘q, munosabat yo‘q. Masalan, Uy-joy xizmat ko‘rsatish vazirligi 420 ta murojaatning — 176 tasiga, Sog‘liqni saqlash vazirligi 354 ta murojaatning — 132 tasiga, Mahalla va oilani qo‘llab-quvvatlash vazirligi 253 ta murojaatning — 140 tasiga, Bandlik va mehnat munosabatlari vazirligi 83 ta murojaatning — 42 tasiga, Oliy va o‘rta maxsus ta’lim vazirligi 83 ta murojaatning — 39 tasiga javob bermagan. Toshkent shahar hokimligi esa 438 ta murojaatning — 325 tasini, Toshkent viloyat hokimiyati 292 taning — 78 tasini, Samarqand viloyat hokimiyati 260 taning — 78 tasini, Xorazm viloyat hokimiyati 92 tadan 31 ta murojaatni e’tiborsiz qoldirgan.

Mahmud Parpiyev,  Senatning Fan, ta’lim va sog‘liqni saqlash masalalari qo‘mitasi raisi o‘rinbosari

Mansabdor shaxslar tomonidan OAV uchun maxsus ochiq matbuot anjumanlari, brifinglar o‘tkazilmagan. Ularning jurnalist va blogerlar bilan munosabatlari turli yig‘ilishlar, sayyor majlislardagi savol-javoblar bilan cheklanib qolmoqda.

Tahlil qilingan 113 nafar matbuot kotibidan 12 nafarining (11%) ish natijalari yuqori, 55 nafari (47%) o‘rta darajada baholangan bo‘lsa, 20 nafari (18%) qoniqarli, 26 nafarining (23%) faoliyati past darajada deb topilgan.

Aksariyat hokimiyat va boshqaruv organlarida qonunning 10-moddasiga ko‘ra, o‘z faoliyati to‘g‘risidagi axborotni tayyorlash va tarqatish vazifasini bajaruvchi axborot xizmatlari tomonidan boshqarma va bo‘limlardan ma’lumot olish tizimi yo‘lga qo‘yilmagan. Qachon ular ma’lumot bersagina, shunda rasmiylashtirilib yoritilayotgani ta’kidlandi.

Hokimiyat va boshqaruv organlarida OAVni o‘zining huzurida akkreditatsiya qilish belgilangan bo‘lsa-da, o‘rganilgan tashkilotlarda bu bo‘yicha hech bir ish qilinmagan. Tuman va shahar hokimiyatlari tomonidan qilingan tadbirlar, majlislar, rasmiy axborotlar haqida press-relizlar yo‘q. Aksariyat tumanlarning axborot xizmatlari uchun avtotransport ajratilmagani tanqid qilindi. Shu o‘rinda Parpiyev Namangan viloyati hokimiyati o‘zining barcha tumanlaridagi axborot xizmatlari rahbarlarini transport bilan ta’minlaganini boshqalarga namuna qilib keltirdi.