Berlinda politsiyachilar COVID-19 pandemiyasi sababli joriy qilingan cheklovlarga qarshi norozilik namoyishlarida kamida 365 kishini qo‘lga oldi, deb yozadi “RBK” Berlin politsiyasi Twitter’iga tayanib.
“19:30 ga qadar jami 365 kishi qo‘lga olindi. Ko‘pchiligi infeksiyadan himoyalanish haqidagi qonunni buzganlik uchun”, — deyiladi muassasa xabarida.
Politsiya ikki kishini so‘roq qilmoqchi. Bundan tashqari, namoyishlarda o‘n nafar politsiya xodimi jabrlangan.
18-noyabr kuni Germaniya bundestagi infeksion kasalliklardan himoyalanish to‘g‘risidagi qonunga tuzatishlar kiritdi, bu Berlin markazida norozilik aksiyalari uyushtirilishiga olib keldi. Qonun loyihasini 413 deputat qo‘llab-quvvatladi, 235 nafari qarshi chiqdi, yana 8 nafari betaraf qoldi.
Tuzatishlarga Germaniyaning hozirgi hukumatini shakllantiruvchi Xristian demokratik ittifoq deputatlari, shuningdek, Sotsial-demokratik partiya deputatlari tashabbuskorlik qildi. Bu siyosiy kuchlar joriy chaqiriq bundestagida ham ko‘pchilik o‘ringa ega.
“Infeksiyalardan himoya to‘g‘risida”gi qonun Germaniya hukumatiga ijtimoiy aloqalarni cheklash va niqob taqish qoidalarini kiritish, do‘konlarni yopish va sport tadbirlarini taqiqlash huquqini berishi, shuningdek, maktab va bog‘chalarni yopish va ta’lim muassasalari uchun boshqa cheklovlarni kiritish tartibini belgilashi taxmin qilinmoqda.
Germaniya poytaxti markazidagi namoyishlarda bir necha o‘n ming kishi qatnashdi. Yangi qonunga qarshi norozilik bildirish uchun namoyishchilar oshxona anjomlarini taqillatib, hushtaklarni chirillatib chaldi.
Politsiya namoyishchilarni tarqalishga chaqirdi, ammo ular parlament binosiga tobora yaqinlashib kelavergach, ular tarqatildi. Politsiya namoyishchilarni quvish uchun suv zambaraklaridan ham foydalandi.
Robert Kox instituti ma’lumotlariga ko‘ra, pandemiya boshidan buyon Germaniyada 883 307 kishi COVID-19’ga chalingan. O‘tgan bir kecha-kunduzda yana 17 561 ta holat aniqlangan. Mamlakatda jami 13 119 kishi koronavirusdan vafot etgan.
Eslatib o‘tamiz, Germaniya kansleri Angela Merkel mamlakatda qaytadan karantin joriy etgan edi. Cheklovlar 2-noyabrdan boshlab kuchga kirdi va kamida dekabr oyigacha davom etadi. Mamlakatda restoran va barlar, teatr va kinoteatrlar, fitnes markazlari va suv havzalari yopildi. Mehmonxonalar turistlarni qabul qilishni to‘xtatdi, konsertlar esa bekor qilindi. Odamlar uydan tashqarida eng ko‘pi bilan 10 kishigacha yig‘ilishi mumkin. Germaniyada koronavirusning birinchi to‘lqini vaqtida yopilgan maktablar va bolalar bog‘chalari hozircha o‘z ishini davom ettiradi.
Izoh (0)