2020 йил 10 ноябрь куни Наманган вилояти Уйчи туманидан одам ўлим билан якунланган йўл транспорт ҳодисаси юз берди. Бу ҳақда ЙҲХББ ахборот хизмати хабар қилган.
ЙҲХББнинг Telegram каналига юкланган видеолавҳада айтилишича, ҳодиса 10 ноябрь куни соат 19:40 ларда Наманган–Уйчи–Учқўрғон 4Р-116 йўлининг 9-километрида BMW аёл пиёдани уриб юборган. Оқибатда жабрланувчи ҳодиса содир бўлган ерда вафот этган.
Уйчи тумани йўллардан фойдаланиш унитар корхонаси раҳбарининг сўзларига кўра йўлда ётиқ чизиқлар чизилиши, белгилар ўрнатилгани, ёритиш тизими муаммоси маблағга боғлиқ масала экани, йўлни жорий таъмирлаш ишлари олиб борилган.
Туман ободонлаштириш бошқармаси бош муҳандиси аҳоли яшайдиган пунктларни ҳеч бўлмаса бир томонлама ёритиш масаласи ижобий ҳал этилиши кераклигини қайд этган. ЙТҲ содир бўлган йўлда ҳам ёритиш чироқлари ўрнатилгани ва қурилиш тугамагани учун ҳанузгача ёқилмаганини билдирган. Туман ҳокимлиги билан биргаликда беш кун ичида трассани ёритиш ишлари амалга оширилишини ваъда қилган.
Ҳодиса содир бўлган «Ёрката» МФЙ раиси ҳам воқеага муносабат билдириб, маҳаллада аҳоли яшаш хонадонлари зич жойлашганлиги, бироқ аҳолининг тротуарлардан фойдаланиш маданияти етарли даражада эмаслигини айтиб ўтган. Устунлардан бирида тезликни ўлчовчи камера ўрнатилгани, аммо қурилма ҳозирги кунда ишламаётганини таъкидлаб, уни ишлатиш чораларини кўриш лозимлигини гапирган. Пиёдалар ўтиш йўлагини чизишни таклиф этган.
«10 ноябрь куни BMW’да Наманган–Учқўрғон йўналишида келаётган вақтимда ЙТҲ содир бўлди. Афсусдаман, ушбу қилмишим учун ўзимни оқлай олмайман. Бу ҳолат яхши эмас. Ҳар бир ҳайдовчидан қоидаларга риоя қилган ҳолда юришларини сўрайман», — деган BMW ҳайдовчиси.
Аввалроқ Наманганда икки юк машинаси иштирокидаги ЙТҲ оқибатида йўловчи вафот этгани, Андижонда Isuzu билан тўқнашган Лабо иккита Nexia ва Damas’ни уриб юборгани, Жиззахда 2 та Howo ҳайдовчиси қарама-қарши йўналишда ўзаро ҳазиллашиши оқибатида машиналар бир-бири билан тўқнашгани ҳамда Зарафшонда ичида йўловчилар бўлган иккита автобус иштирокида авария юз бергани ҳақида хабарлар берилган.
Изоҳ (0)