2021-yil boshida AQShning O‘zbekistondagi elchixonasi Xalqaro ta’lim bo‘yicha Amerika Kengashlari (American Councils) bilan hamkorlikda “Amerikaga darcha” tashabbusini ishga tushiradi va ushbu g‘oya mamlakat bo‘ylab amalga oshiriladi. Bu haqda elchixona axborot xizmati xabar qilgan.
“Amerikaga darcha” markazlarida zamonaviy resurslarga ega kutubxonalardan foydalanish, xususan, elektron va qog‘ozli kitoblar, ingliz tilidagi ilmiy va madaniy manbalarni mutolaa qilish, internetga ulangan kompyuter laboratoriyalaridan foydalanish imkoni yaratiladi. Ma’rifat maskanlarida, shuningdek, amerikalik mutaxassislar ishtirokida ma’ruzalar, suhbatlar hamda ingliz tilida filmlar namoyishi tashkil etiladi.
Bundan tashqari, “Amerikaga darcha” maskanlarida AQShda bakalavriat va magistratura dasturlarida o‘qishni istagan nomzodlarga bepul maslahat xizmatini ko‘rsatadigan Education USA markazi faoliyat yuritadi.
“Amerikaga darcha” birinchi markazining qurilishi 30-sentabrda Qarshidagi “Barkamol avlod” markazida boshlangan.
Qarshidagi markaz 230 kvadrat metr maydon egallashi va Markaziy Osiyoda eng katta “Amerikaga darcha” markazi bo‘lishi kutilmoqda. Ma’rifat maskani kompyuter laboratoriyasi, kutubxona, anjumanlar zali va Education USA sinflarini o‘z ichiga oladi. Markazning butun maydoni zamonaviy shisha devorlarga va Amerika uslubidagi dizaynga ega bo‘ladi.
American Councils 2018-yilda Toshkentdagi vakolatxonasini qayta ochdi va hozirda Kelajak yetakchilar almashinuvi dasturi, Ingliz tilida so‘zlashuvchi millat: O‘rta maktab o‘qituvchilarining malakasini oshirish tashabbusi, O‘zbekiston biznes rahbarlari almashinuvi dasturi va Markaziy Osiyo universitetlari bilan hamkorlik kabi 13 xil dastur portfelini boshqaradi.
Yaqin oylar ichida AQShdagi yetakchi universitetlar, pedagoglarning malakasini oshirish va qayta tayyorlash hududiy markazlaridan yana 16 nafar ingliz tili o‘qituvchilari va professorlarning (PhD) O‘zbekistonga kelishi kutilmoqda.
Izoh (0)