2021 йил бошида АҚШнинг Ўзбекистондаги элчихонаси Халқаро таълим бўйича Америка Кенгашлари (American Councils) билан ҳамкорликда «Америкага дарча» ташаббусини ишга туширади ва ушбу ғоя мамлакат бўйлаб амалга оширилади. Бу ҳақда элчихона ахборот хизмати хабар қилган.
«Америкага дарча» марказларида замонавий ресурсларга эга кутубхоналардан фойдаланиш, хусусан, электрон ва қоғозли китоблар, инглиз тилидаги илмий ва маданий манбаларни мутолаа қилиш, интернетга уланган компьютер лабораторияларидан фойдаланиш имкони яратилади. Маърифат масканларида, шунингдек, америкалик мутахассислар иштирокида маърузалар, суҳбатлар ҳамда инглиз тилида фильмлар намойиши ташкил этилади.
Бундан ташқари, «Америкага дарча» масканларида АҚШда бакалавриат ва магистратура дастурларида ўқишни истаган номзодларга бепул маслаҳат хизматини кўрсатадиган Education USA маркази фаолият юритади.
«Америкага дарча» биринчи марказининг қурилиши 30 сентябрда Қаршидаги «Баркамол авлод» марказида бошланган.
Қаршидаги марказ 230 квадрат метр майдон эгаллаши ва Марказий Осиёда энг катта «Америкага дарча» маркази бўлиши кутилмоқда. Маърифат маскани компьютер лабораторияси, кутубхона, анжуманлар зали ва Education USA синфларини ўз ичига олади. Марказнинг бутун майдони замонавий шиша деворларга ва Америка услубидаги дизайнга эга бўлади.
American Councils 2018 йилда Тошкентдаги ваколатхонасини қайта очди ва ҳозирда Келажак етакчилар алмашинуви дастури, Инглиз тилида сўзлашувчи миллат: Ўрта мактаб ўқитувчиларининг малакасини ошириш ташаббуси, Ўзбекистон бизнес раҳбарлари алмашинуви дастури ва Марказий Осиё университетлари билан ҳамкорлик каби 13 хил дастур портфелини бошқаради.
Яқин ойлар ичида АҚШдаги етакчи университетлар, педагогларнинг малакасини ошириш ва қайта тайёрлаш ҳудудий марказларидан яна 16 нафар инглиз тили ўқитувчилари ва профессорларнинг (PhD) Ўзбекистонга келиши кутилмоқда.
Изоҳ (0)