General Motors автомобиль корпорацияси батареяларининг ёниб кетиш хавфи сабаб 68 667 та Chevrolet Bolt EV электромобилларини чақириб олади, деб хабар беради «Korrespondent.net».
Компаниядагиларнинг таъкидлашича, гап 2017—2019 йиллар оралиғидаги моделлар ҳақида кетмоқда, уларнинг аксарияти (50 925) АҚШ ҳудудида сотилган.
«General Motors ва Chevrolet Жанубий Кореядаги LG Chem заводида ишлаб чиқарилган, юқори волтли аккумуляторларга эга Chevrolet Bolt’ларни ўз хоҳиши билан чақириб олишга қарор қилди, чунки у тўлиқ ёки деярли тўлиқ қувватлантирилганида ёниб кетиши мумкин», — дейилади хабарда.
Бугунги кунда аккумуляторларнинг ёниб кетиши бўйича бешта ҳолат тасдиқланган бўлиб, уларнинг учтаси октябрь ойида аниқланган.
Кўнгилсиз ҳодисалар натижасида икки киши жароҳат олган. General Motors ҳозирда аккумуляторлар нима сабабдан ёнаётганини аниқламаган.
Эслатиб ўтамиз, 2015 йилда General Motors мой оқиши муаммоси сабаб 1,4 миллион, 2016 йилда тормоз тепкисидаги муаммолар туфайли АҚШ ва Канада бўйлаб 473 мингта пикап (енгил юк ортиш автомашинаси) ва йўлтанламасларни, 2017 йилда рулдаги муаммолар сабаб жаҳон бўйича 800 минг автомобилини чақириб олган эди.
Изоҳ (0)